Alessandro Sabella, concelleiro do municipio italiano de Pistoia, visita Boente, en Arzúa
Foi recibido pola presidenta da Mancomunidade de Concellos Galegos do Camiño Francés, Begoña Balado Conde, acompañada dos Alcaldes e representantes do Camiño Francés en Galicia
Laura Moure/Arzúa
A presidenta da Mancomunidade de Concellos Galegos do Camiño Francés, Begoña Balado Conde, acompañada dos Alcaldes e representantes do Camiño Francés en Galicia, recibiron a Alessandro Sabella, concelleiro do municipio italiano de Pistoia, en Boente, Arzúa.
Precisamente aquí é onde se prantou un dos 11 cipreses, regalo do municipio italiano, que viaxaron dende a Toscana para ocupar o seu sitio en cada un dos concellos que integran a Mancomunidade. Xunto a cada unha destas árbores, instalouse unha placa que recolle o vínculo entre o Camiño de Santiago en Italia e o Camiño de Santiago Francés.
Acompañando a Alessandro Sabella, atopábase tamén Mario Menici, peregrino de Pistoia que fai o Camiño Francés a cabalo dende hai 28 anos. "É unha honra para nós, contar cun peregrino que ano tras ano, elixe a nosa ruta para peregrinar a Santiago", comenta Begoña Balado.
PUBLICIDADE
Este acto, enmárcase dentro das relacións culturais e turísticas que a Mancomunidade ten con Italia, en concreto con Pistoia, o chamado Santiago Italiano, posto que é dende o ano 1145, custodio da única reliquia oficialmente recoñecida do Apóstolo Santiago, fóra de Santiago de Compostela.
No evento, ó que tamén acudiu o director do Xacobeo, D. Ildefonso de la Campa, a Presidenta da Mancomunidade, Begoña Balado, reiterou a vontade da Mancomunidade de Municipios Galegos do Camiño Francés de seguir establecendo lazos de relación e amizade permanente con Italia, neste caso, a través do municipio de Pistoia, un dos países do que cada ano nos visitan unha alta porcentaxe de peregrinos.
PUBLICIDADE
Pola súa parte, Alessandro Sabella, manifestou que no ano 2027, voltaría a Galicia para facer unha nova colaboración coa Mancomunidade do Camiño Francés, dado que esta ruta segue a ser a preferida dos italianos que peregrinan a Santiago.
Comentarios