A Xunta licita por 1,2 M€ a rehabilitación integral do Colexio Camiño de Santiago, no Pino

Tal e como comprometera o conselleiro no verán, renovarase por completo a envolvente dos edificios, acadando un aforro enerxético e de emisións dun 30%

Laura Moure/O Pino

A Consellería de Educación, Ciencia, Universidades e FP vén de licitar por case 1,2 M€ a rehabilitación integral co Centro Público Integrado Camiño de Santiago, no Pino. Cúmprese así co compromiso adquirido polo conselleiro Román Rodríguez, na súa visita ao centro o pasado mes de agosto, de iniciar os trámites para contratar esta obra neste ano 2026.

A intervención vai supoñer a renovación total da envolvente do que é o único colexio de Infantil, Primaria e Secundaria deste concello coruñés, acadando un aforro enerxético do 30% tanto en consumo de enerxía primaria non renovable como en emisións de dióxido de carbono. Como consecuencia, producirase tamén unha importante mellora no confort térmico diario da comunidade educativa.

 PUBLICIDADE

Preme na imaxe para obter máis información do evento.

O programa de actuacións contempla a substitución de 1.942,83m² de cuberta, 126 fiestras e cinco portas. Ademais, aplicarase sistema de illamento térmico polo exterior tipo SATE en 1886m² de fachadas e instalaranse 626 novas luminarias de alta eficiencia enerxética e 179 luces de emerxencia.

 PUBLICIDADE

Preme na imaxe para contactar connosco.

O CPI Camiño de Santiago está composto por un edificio orixinal que está a piques de cumprir 50 anos e dunha ampliación que data de finais dos 90. O illamento das fachadas e a renovación de carpinterías exteriores e luminarias afecta a ambos edificios, mentres que a cuberta só se mudará no edificio orixinal e nos patios exteriores. A maiores, colocaranse falsos teitos en todo o centro e renovarase a chapa exterior que pecha a escaleira de emerxencia, entre outras tarefas.