A Xunta aproba o proxecto que faltaba da LU-231 Palas-Friol cun investimento de 4,8 millóns de euros

Afecta dende Castrelo á Baiuca, no termo municipal palense

Ecos da Comarca/Palas de Rei

O Consello da Xunta aprobou definitivamente o proxecto de construcción da mellora da estrada Palas-Friol LU-231, no treito comprendido entre Castrelo e A Baiuca, no enlace coa autovía A-54, que suporá un investimento de preto de 4, 8 M€.

Esta nova actuación do Goberno galego daralles continuidade ás obras xa executadas no treito inicial de 9, 4 quilómetros desta vía autonómica, entre a travesía de Friol e o acceso a Castrelo. Con esta nova actuación, o Goberno galego completará a mellora integral dos 18, 7 quilómetros de lonxitude da estrada entre Friol e A Baiuca, que sumará en total un investimento autonómico de máis de 7, 5 M€.

En concreto, o proxecto aprobado comprende a mellora dos outros 9,3 quilómetros de lonxitude que conforman a estrada autonómica, entre os puntos quilométricos 9+400 (Castrelo) e o 18+700 (A Baiuca, no enlace coa A-54), no termo municipal de Palas de Rei.

Neste caso, trátase de levar tamén a cabo a ampliación da plataforma da estrada ata os 8 metros e de mellorar o trazado das curvas máis pronunciadas, con raios insuficientes, coa finalidade de darlle coherencia ao trazado. Deste xeito, a intervención nova incide na seguridade viaria e en proporcionar desprazamentos máis cómodos aos vecinos.

Na intervención inclúense 9 obras de drenaxe transversal e, como actuacións complementarias, a restauración vexetal dos noiros de contornos fluviais, onde se sitúan as obras de drenaxe transversal mediante o estendido de terra vexetal(obtida da propia obra) e a prantación de especies leñosas autóctonas.

Publicidade

Preme na imaxe para obter máis información do evento.

Tamén se reporán os firmes e pavimentos, se incorporarán as medidas de sinalización e balizamento necesarias para a seguridade viaria e se restituirán os servizos que resulten afectados.

A aprobación definitiva deste proxecto no Consello da Xunta comporta tamén a declaración de utilidade pública, polo que se dispón a urxente ocupación dos 235 predios necesarios para executar esta intervención.

Publicidade

Preme na imaxe se quere contactar connosco.

Os orzamentos da Xunta deste ano reservan xa 2M€ para este eixe Friol-Palas de Rei-Begonte, que suporá unha mellora que permitirá conformar, xunto coa estrada provincial LU-P-1611, un eixe norte-sur de mobilidade con prestacións axeitadas entre a A-54 en Palas de Rei a A-6 en Begonte, nun punto próximo ao enlace coa A-8, favorecendo a competitividade.

O alcalde de Palas, Pablo Taboada, amosa a súa satisfacción pola aprobación deste proxecto correspondente a segunda fase de ampliación e mellora do tramo que faltaba e que afecta ó termo municipal de Palas de Rei. “É unha estrada moi demandada e necesaria para o noso municipio, que a súa vez, conformará unha infraestrutura vertebradora e transformadora para o interior da Comunidade, favorecendo unhas comunicacións máis seguras e eficientes no rural”, a súa vez, agradeceu ó goberno da Xunta de Galicia por comprometerse coas melloras nas conexións con Palas de Rei.