A veciña de Touro Cristina Esturao homenaxeada polos seus 25 anos como óptica optometrista

hace 6 minutos

5 min de lectura

O Colexio Oficial de Ópticos Optometristas de Galicia rendiu un tributo a 4 colexiados que suman máis de catro décadas dedicadas á saúde visual e a outros 40 que cumpren 25 anos de profesión

Laura Moure/Touro

O Colexio Oficial de Ópticos Optometristas de Galicia celebrou o sábado en Santiago un acto de homenaxe a 4 colexiados e colexiadas que suman máis de catro décadas dedicadas á saúde visual da poboación, e a outros 40 colexiados e colexiadas que cumpren 25 anos de profesión, entre eles a veciña de Touro, Cristina Esturao Rodríguez. O acto, encabezado pola presidenta do Colexio, Esther Amaro, e toda a súa xunta de goberno, contou coa asistencia de membros das primeiras xuntas da entidade, como os presidentes de honra do Colexio Enrique Valcárcel e Eduardo Eiroa.

Todos os homenaxeados recibiron un diploma honorífico en agradecemento polo seu traballo, e os máis veteranos tamén un un pin de ouro polo seu esforzo e traballo de toda unha vida dedicada á visión. A presidenta do Colexio, Esther Amaro, destacou o especial dun evento no que se celebra “a gratitude, o orgullo e o recoñecemento á traxectoria de profesionais que dedicaron unha parte fundamental das súas vidas para coidar en grao sumo prezado que posúe o ser humano, a súa forma de mirar o mundo. Un compromiso inquebrantable coa saúde pública”.

Esther Amaro ofreceu unhas emotivas e orgullosas palabras para os colexiados e colexiadas que cumpriron 40 anos de profesión. “Foi toda unha vida dedicada á profesión. Vós fostes os pioneiros. Cando empezastes, o panorama era completamente distinto ao actual. Co voso esforzo diario, demostrando rigor clínico e defendendo a importancia do voso traballo en cada recuncho das nosas vilas e cidades, construístes os cimentos do que hoxe é o noso Colexio e a nosa profesión. Se as novas xeracións desfrutan hoxe do respecto social e científico que ten o óptico optometrista, é porque vós pasastes corenta anos demostrando a nosa valía con excelencia, ética e humanidade. O voso legado non está nos papeis; está nos ollos das xeracións que vos seguiron e aprendido de vós”, manifestou.

Para os colexiados e colexiadas que cumpriron un cuarto de século, Esther Amaro trasladoulles os seus parabéns, destacando que foron testemuñas e protagonistas dunha transformación radical na Óptica e a Optometría. “Vivistes a dixitalización dos gabinetes, a chegada de tecnoloxías diagnósticas, que antes parecían de ciencia ficción, e a consolidación definitiva da nosa figura como a primeira fronte de atención na saúde visual da sociedade. Soubestes adaptarvos, formarvos continuamente e madurar sen perder un chisco desa paixón inicial. Sodes o motor actual da nosa profesión, a ponte perfecta que une a experiencia consolidada co futuro que vén”, asegurou.

En sintonía coa impecable traxectoria dos colexiados e colexiadas homenaxeadas, Esther Amaro reafirmou o compromiso firme do Colexio para seguir traballando e esixindo solucións ás autoridades sanitarias galegas. “Hoxe queremos alzar a voz ante unha realidade que resulta, sinxelamente, incomprensible. Resulta paradoxal e profundamente inxusto que, sendo Galicia a primeira comunidade autónoma en solicitar formalmente a incorporación da nosa profesión ao sistema público, sigamos sendo a día de hoxe a única autonomía que non ten creada a figura estatutaria do óptico optometrista na súa sanidade pública. Mentres outras comunidades avanzan, integran o noso coñecemento e desconxestionan os seus servizos de saúde aproveitando o noso potencial, na nosa terra atopámonos ante unha anomalía administrativa que frea a saúde visual dos galegos. Seguiremos insistindo, con argumentos científicos e de xestión, na necesidade urxente de incluír de forma plena ao óptico optometrista na Atención Primaria do Sergas. É unha cuestión de eficiencia, de redución de listas de espera e, sobre todo, de equidade. O voso traballo diario nos gabinetes xa demostra o que somos capaces de facer. Agora tócanos a nós conseguir que as institucións galegas emenden dunha vez por todas esta débeda histórica”, argumentou.

Historia viva da optometría e campañas de prevención para mellorar a saúde visual

A óptico optometrista Rosa Ana Vicente foi un das homenaxeadas que cumpriu 40 anos de colexiación e falou en nome dos seus compañeiros máis lonxevos. Madrileña de nacemento, Rosa Ana se diplomouse na primeira promoción de Óptica e Optometría na Facultade de Óptica da Universidade Complutense de Madrid, co novo plan de estudos no ano 1985. Tras traballar tres anos en diferentes establecementos sanitarios de óptica por distintas provincias españolas, chegou á cidade de Ourense onde traballou por conta allea ata abrir a súa propia óptica no ano 2000. Desde Óptica As Caldas viu como ha evolucinado a profesión nestas décadas, abríndose un oco e mellorando a súa imaxe sanitaria no campo da saúde visual. “A profesión progresou e cambiou moito en consonancia coa evolución da sociedade”, argumenta.

Pola súa banda, a óptico optometrista Esther Rego Fernández, falou en nome dos corenta profesionais que cumpriron neste 2026 25 anos de profesión. Desde a súa óptica en Covas, no municipio de Viveiro, a optometrista relata a súa experiencia profesional, primeiro cunha pequena óptica e despois con outra máis ampla aberta en 2003 nesta paraxe da Mariña lucense desde onde ofrece servizos de contactología, ortoqueratología e controis de saúde visual. “Como primeiros axentes sanitarios en a atención primaria de a saúde visual, os ópticos optometristas debemos concienciar á poboación de que é necesario que revisen a súa visión para previr e detectar alteracións visuais”, indica.

Esther Rego explica que centra parte dos seus esforzos en realizar campañas de prevención, dedicadas especialmente aos nenos, ofrecéndolles, nas revisións principalmente de miopía, pautas de hixiene, limitación no uso de pantallas e o fomento das actividades ao aire libre. Por exemplo, unha das campañas que puxo en marcha o pasado ano centrouse en montar unha cometa, con instrucións achegadas pola óptica, e poñela a voar, para finalmente subir unha foto ás redes sociais do establecemento sanitario de óptica co obxectivo de fomentar as actividades dos nenos ao aire libre e mellorar a súa visión e, mesmo, os vínculos familiares. A optometrista pretende volver activar esta campaña a próxima primavera.

Preme na imaxe para obter máis información do evento.

Outra das accións preventivas de Rego son as campañas de saúde visual en colexios da zona da Mariña. Na súa primeira incursión no curso 2025-2026, a optometrista obtivo nos resultados pouca agudeza visual entre os escolares. Neste novo curso, Rego pretende repetir a iniciativa introducindo máis marcadores socioculturais e económicos. “É fundamental que máis compañeiros de profesión súmense a esta iniciativa. Podemos ofrecer corrección visual para evitar o fracaso escolar, e mesmo axudar en casos de bullyng porque un neno utiliza unha lente grosa”, comenta.

Rego tamén fala do traballo visual con adultos e persoas maiores, ofrecendo a mellor corrección óptica posible ata que chegue o momento de derivar ao especialista. “A optometría pode chegar a cambiar a vida dunha persoa. Nun paciente con baixa visión que non pode comer só, podémoslle indicar técnicas como cambiar a cor dos pratos para axudarlle a ser autónomo”. Por todo iso, Rego sinala que a óptica e optometría é unha das profesións sanitarias máis bonitas e diversas que existen. “Traballamos libremente e temos un papel moi importante. O mellor é facer un traballo que che guste para dignificar a profesión” asegura.

Ao evento, que tivo lugar no Hotel Monumento Santo Francisco de Santiago, asistiron tamén a xefa territorial da Consellería de Sanidade na Coruña, Cristina Pérez Fernández; o deputado e secretario da Mesa do Parlamento de Galicia, Julio García Comesaña; a deputada do Parlamento de Galicia do Bloque Nacionalista Galego , Iria Carreira; o deputado do Grupo Parlamentario Socialista no Parlamento de Galicia, Aitor Bouza; o decano da Facultade de Óptica e Optometría da Universidade de Santiago (USC), Carlos García Resúa; o presidente do Colexio de Ópticos Optometristas de Castela e León, Luis Ángel Merino; o presidente do Colexio de Ópticos Optometristas de Cataluña, Joaquim Grau; e a presidenta do Colexio de Ópticos Optometristas da Región de Murcia, Ester Mainar.

PUBLICIDADE