A Garda Civil investiga a un condutor por circular a 219 km/h e carecer de permiso en vigor

Ecos da Comarca/Xeral

A Garda Civil, a través de efectivos do Sector de Tráfico de Galicia, procedeu á investigación dun home de 45 anos de idade como presunto autor de dous delitos contra a seguridade viaria. Ao implicado atribúeselle unha presunta autoría por conducir un vehículo de motor a unha velocidade delituosa e outra por facelo carecendo da correspondente autorización administrativa en vigor debido á perda da súa vixencia.

Os feitos producíronse a noite do pasado 31 de maio, aproximadamente ás 21:37 horas, durante un punto de verificación de velocidade establecido por un radar móbil do Destacamento de Tráfico da Garda Civil de Ferrol. Os axentes detectaron un turismo que circulaba a 219 km/h á altura do punto quilométrico 33,300 da autoestrada AP-9F, superando a velocidade máxima permitida nese tramo específico, que está fixada en 100 km/h.

 PUBLICIDADE

Preme para obter máis información.

A velocidade rexistrada pasa amplamente o limiar penal tipificado para as vías interurbanas, onde constitúe delito superar en máis de 80 km/h o límite establecido. Ante a imposibilidade de interceptar o vehículo de forma inmediata no momento do control, o Equipo de Investigación de Sinistros (EIS) iniciou de forma inmediata as correspondentes xestións para o esclarecemento dos feitos.

As investigacións posteriores permitiron a localización inequívoca do turismo, así como a plena identificación do condutor implicado. Durante a fase de verificación documental, os axentes constataron ademais que o condutor carecía de permiso de condución válido ao perder a vixencia do mesmo de xeito definitivo.

 PUBLICIDADE

Preme na imaxe e contacta con nós!

As dilixencias instruídas por estes feitos foron remitidas ao Tribunal de Instancia de Guardia de Ferrol.