A Festa do Queixo arrinca en Arzúa cunha xornada inaugural marcada pola gran afluencia de público

Laura Moure/Arzúa

Arzúa deu onte o pistoletazo de saída a unha nova edición da Festa do Queixo cunha primeira xornada que destacou pola elevada participación de público, o ambiente festivo nas rúas e unha programación pensada para todos os públicos.

Desde primeiras horas da mañá, o recinto feiral “Terra do Queixo” converteuse no epicentro

da celebración coa apertura dos postos das queixerías participantes, que ofreceron degustación e venda do produto estrela desta cita gastronómica. Visitantes chegados de

diferentes puntos de Galicia e de fóra da comunidade achegáronse para gozar dun evento

que combina tradición, calidade e identidade local.

A xornada estivo marcada tamén pola celebración do pregón, que este ano correu a cargo

de Federico Pérez Rey, quen puxo en valor a tradición queixeira de Arzúa e o sentimento colectivo arredor dunha festa que é xa símbolo de identidade para a vila.

No marco do acto institucional fíxose entrega do premio do concurso de petiscos ao Bar Os Amigos, establecemento gañador desta edición grazas á súa proposta gastronómica, que destacou pola calidade e creatividade.

 Publicidade

Preme para obter máis información.

Ademais, esta edición da Festa do Queixo rende homenaxe á emigración, recoñecendo o

esforzo e a pegada das persoas que tiveron que marchar fóra e que contribuíron, desde a

distancia, ao desenvolvemento económico e social da vila. A lembranza e o agradecemento ás persoas emigradas estiveron moi presentes durante o acto.

O alcalde de Arzúa destacou a relevancia do evento como motor económico e social para o municipio: “A Festa do Queixo é unha peza fundamental para o noso tecido empresarial.

Estes días supoñen unha oportunidade real para as queixerías, para o comercio local, para

a hostalaría e para todos os sectores que viven directa ou indirectamente da actividade que se xera arredor da festa”. O rexedor subliñou tamén o valor estratéxico da celebración para o futuro do territorio: “Estamos a falar dunha festa que pon en valor o noso produto estrela, pero tamén o noso modelo de vida. Apostar polo queixo, pola transformación agroalimentaria e pola artesanía é apostar polo futuro do rural, pola fixación de poboación e pola creación de emprego vinculado á nosa identidade”.

 Publicidade/DOAZÓN PARA ECOS DA COMARCA

Fai unha doazón para axudar ao xornalistmo independente. Gracias!

Paralelamente, as rúas próximas ao recinto acollen durante toda a fin de semana o Mercado de Artesanía organizado pola Deputación da Coruña e Turismo da Deputación da Coruña, unha proposta que reúne a artesáns e artesás de distintos ámbitos como a cerámica, o téxtil, a madeira ou a ilustración. Esta feira contribúe a enriquecer a programación e a converter Arzúa nun espazo de encontro para a creatividade e a produción artesanal galega.

A primeira xornada completouse cun programa de actividades culturais e musicais que animaron diferentes puntos da vila, consolidando a Festa do Queixo como unha celebración interxeracional e aberta á participación de toda a cidadanía. A organización valora moi positivamente o desenvolvemento deste primeiro día e agarda que a afluencia continúe ao longo da fin de semana, na que están previstas novas actividades, concertos e actos institucionais que reforzan o papel da Festa do Queixo como unha das citas gastronómicas e culturais máis relevantes de Galicia. (NOS VINDEIROS DÍAS PUBLICAREMOS VÍDEO, ONDE FALAMOS CON PREGOEIRO).