top of page

A Deputación mellorará a estrada de Ligonde, en Monterroso, cun investimento de preto de 200.000 €

A execución das obras de acondicionamento do treito que vai do quilómetro 5,3 ao 8,9 están en fase de contratación


Laura Moure/Monterroso

O presidente da Deputación de Lugo, José Tomé Roca, visitou este venres a parroquia monterrosina de Ligonde, onde anunciou os avances para continuar mellorando cun investimento de preto de 200.000 euros a estrada provincial LU-P-3305, que une este lugar con Sastrexas. José Tomé, xunto á voceira socialista do Goberno, Pilar García Porto, detallou en Monterroso que as obras xa están en fase de licitación, polo que nas vindeiras semanas se adxudicarán.

O proxecto afecta a algo máis de 3 quilómetros da estrada, entre os puntos quilométricos 5,3 e 8,9. As tarefas consistirán na limpeza de laterais e obras de drenaxe, tamén se pavimentará con aglomerado en quente e sinalización mediante marcas viais reflexivas brancas. Unha vez iniciadas as obras, o prazo de execución é de 2 meses.


Estes traballos dan continuidade a outros realizados pola Deputación nesta mesma estrada entre o quilómetro 4 e o 5,3 cun investimento de máis de 83.000 euros. Consistiron na ampliación da plataforma ata acadar os 5 metros de ancho, na reposición das obras de drenaxe existentes, e tamén na pavimentación e sinalización horizontal correspondente. O mandatario provincial subliñou na visita a importancia desta actuacións porque se trata dunha estrada moi transitada pola veciñanza, co que gañarán seguridade e comodidade nos seus desprazamentos.


José Tomé Roca subliña que con estas obras na rede viaria provincial, a máis extensa de España, con máis de 4.200 quilómetros, e tres veces superior á da Xunta en Lugo, a Deputación de Lugo segue traballando “nun dos nosos principais obxectivos, como é a mellora das comunicacións viarias, necesarias para aumentar a calidade de vida dos veciños e veciñas, e favorecer a igualdade de oportunidades e o reequilibrio territorial”.

2,5 millóns de euros neste concello

Con esta nova colaboración económica que fai agora a Deputación de Lugo, o investimento da institución en Monterroso no que vai de mandato é de 2,5M€, un recursos que inxectou a través do Plan Único de Cooperación cos Concellos, melloras de estradas, creación de emprego, colaboración co tecido asociativo da localidade, entre outras accións que repercuten no día a día da xente.





0 comentarios

Comentários


IRS.gif
Copia de ¡TU Anuncio!.gif
Ecos_da_Comarca_neg.png
bottom of page