A Casa de Correos de Arzúa acolle unha exposición fotográfica de Gabriel Tizón

Poderá visitarse do 9 de outubro ao 21 de novembro

Laura Moure/Arzúa

O Departamento de Cultura do Concello de Arzúa informa que a Casa de Correos acolle dende este venres unha exposición fotográfica de Gabriel Tizón. Da man da Concellaría de Cultura e da Asociación Cultural Ateneo Berger, a mostra titulada Entre nós poderá visitarse do 9 de outubro ao 21 de novembro, en horario de luns a venres de 10:00 a 14:00 horas e de 15:00 a 18:30 horas e os sábados de 10:30 a 13:00 horas.

Unha exposición por e para persoas que conviven nun único lugar entendendo a riqueza da diversidade como a maior das igualdades. Na que as persoas teñen que ser as protagonistas, para invitalas a reflexionar en tempos de tanta sobre información ao redor daquelas cousas que nos fan olvidar o que realmente é importante: a vida e a terra que compartimos. Esta mostra tamén pretende facer reflexionar a toda a veciñanza, en especial aos máis mozos que son o futuro da nosa sociedade.

 PUBLICIDADE

Preme na imaxe para obter máis información.

Segundo palabras do propio Gabriel Tizón “como autor deste traballo feito en tantos países, aprendín de tantas persoas e culturas que o cambio só se pode facer coa educación e coa cultura, por iso o obxetivo é amosar como estas persoas están a loitar polas súas liberdades, como fixeron os nosos, algo que non deberíamos deixar de facer, traballar e cuidarnos en beneficio común”.

Este venres, 9 de outubro, levarase a cabo a inauguración da mostra ás 19:00 horas na Casa de Correos nun acto aberto a todo o público e que contará coa presenza do fotógrafo.

  PUBLICIDADE

Preme na imaxe para contactar connosco.

O Concelleiro de Cultura, José Luís García, anima á veciñanza a “participar nesta mostra, idónea parta todos os públicos, co fin de desfrutar da calidade das fotografías e ao mesmo tempo reflexionar sobre as ensinanzas que nos transmiten”. Tamén quere “agradecer publicamente á Asociación Ateneo Berger e a Gabriel Tizón achegar esta proposta a Arzúa, o que fai enriquecer a programación cultural do noso concello”.