A Casa das Mulleres de Arzúa estrea unha nova programación de actividades este mes de outubro

A Área de Igualdade dá un novo impulso a este espazo de encontro e participación con propostas que se irán renovando mes a mes e garantirán unha programación continuada ao longo do ano

Laura Moure/Arzúa

A Casa das Mulleres estrea este mes de outubro unha nova programación de actividades coa que a Área de Igualdade quere reforzar a actividade deste espazo e abrir novas posibilidades de encontro e participación. As propostas iranse renovando cada mes, cunha axenda propia ao longo de todo o ano que garanta unha programación estable.

A programación de outubro reúne actividades culturais e formativas, encontros, asesoramento e iniciativas arredor da igualdade, da saúde, da literatura e da memoria das mulleres.

Lucía López, concelleira de Igualdade de Arzúa.

 PUBLICIDADE

Preme na imaxe para obter máis información.

Lucía López, concelleira de Igualdade, sinala que "outubro é o primeiro de moitos meses nos que imos contar cunha programación propia, continuada e estable na Casa das Mulleres, con actividades diversas e cun espazo cada vez máis aberto á participación".

A concelleira destaca tamén que "a Casa das Mulleres está a disposición dos colectivos de mulleres, feministas e LGBT como lugar de encontro e para desenvolver as súas propias iniciativas". "Queremos que sexa un espazo para todas as persoas que queren construír unha Arzúa en igualdade", engade López.

 PUBLICIDADE

Preme na imaxe para contactar connosco.

Programación de outubro

1. 2 de outubro – IES Arzúa 12:50 h. Teatro «NABIZA GIRL 2», con Isabel Risco.

2. 5 de outubro – Casa das Mulleres 11:00 h. Obradoiro sobre regularización extraordinaria, con MPLP.

3. 8 de outubro – Os xoves na Casa! 17:00 h. Día da Menopausa. Exposición e mostra de libros.

4. 10 de outubro – Tecendo Irmandade 9:45 h. Excursión a Padrón e Arousa con Rosalía de Castro.

5. 15 de outubro – Os xoves na Casa! | Día das Mulleres Rurais 17:00 h. Encontro informativo sobre familias monomarentais, con merenda e ludoteca, con FAGAMOS.

6. 17 de outubro – Tecendo Irmandade 9:45 h. Excursión ao Deza con Maruja Mallo.

7. 19 de outubro – Día das Escritoras 12:00 h. Inauguración do Recuncho de lectura pola igualdade.

8. 22 de outubro – Os xoves na Casa! 17:00 h. Obradoiro «O XOGO DAS ESCRITORAS» para crianzas.

9. 26 de outubro – Casa das Mulleres 10:00 h. Servizo de asesoramento xurídico en estranxeiría, con MPLP.

10. 29 de outubro – Os xoves na Casa! 17:00 h. Inicio do obradoiro «AS MULLERES CONTAMOS A NOSA HISTORIA», de escrita autobiográfica.