A alcaldesa de Antas de Ulla denuncia o silencio da Xunta ante a posta en marcha a residencia de maiores

"Mentres tanto, dez persoas da antiga residencia municipal foron trasladadas a Monterroso hai case tres anos, e Antas de Ulla segue sen resposta nin data de apertura", lamenta

Ecos da Comarca/Antas de Ulla

A alcaldesa de Antas de Ulla, Pilar García Porto, denuncia "o silencio da Xunta ante un proxecto esencial para o municipio", como é a residencia de maiores deste municipio.

Tal e como indican dende o Concello, a rexedora leva máis de nove meses solicitando unha reunión coa Consellería de Política Social e Igualdade para tratar a posta en marcha da nova residencia de maiores, unha infraestrutura fundamental para o benestar da veciñanza.

 PUBLICIDADE

Preme na imaxe para obter máis información do evento.

"A residencia, practicamente rematada e construída con fondos europeos NextGenerationEU, supón un investimento de máis de 3,2 millóns de euros e conta con 56 prazas residenciais, que cubrirían unha necesidade real e urxente da nosa poboación maior. Mentres tanto, dez persoas da antiga residencia municipal foron trasladadas a Monterroso hai case tres anos, e Antas de Ulla segue sen resposta nin data de apertura", lamenta.

PUBLICIDADE

Preme na imaxe se queres contactar connosco.

A alcaldesa reitera a súa disposición ao diálogo e á colaboración institucional, pero tamén a súa firmeza en defender os dereitos das persoas maiores e esixir un trato digno e xusto para o seu municipio.  “Antas de Ulla non pide privilexios, pide xustiza, sensibilidade e respecto para as nosas persoas maiores.”