Ecos da Comarca/Xeral
Un tren de mercadorías sufriu danos logo de atropelar tres vacas en Oza-Cesuras. O convoi permaneceu detido na parroquia de Mondoi mentres duraron os traballos dos equipos de emerxencias e, por fortuna, ningunha persoa resultou ferida, tal e como informa o 112 Galicia.
Os axentes da Garda Civil informaron do ocorrido ás 20 horas do martes, explicando que un tren de mercadorías que cubría a ruta entre León e Vigo sufrira danos logo de atropelar varias vacas á altura de Mondoi.
Publicidade
Rapidamente, desde o 112 Galicia informouse aos axentes da Garda Civil e ao persoal de ADIF, que se encargou de retirar os restos dos animais e, contra a medianoite, informaban do restablecemento da circulación polo punto.
Ademais, foron informados os Bombeiros de Betanzos e o GES de Curtis.
