top of page

Os 40 anos da Asociación Cultural Vista Alegre de Bandeira, Silleda

Música, o estreo dun documental e dunha peza sobre o colectivo e moitas boas palabras centraron a celebración este domingo


Laura Moure/Silleda

A presidenta da Deputación de Pontevedra, Carmela Silva, particiou onte nos actos con motivo do cuadraxésimo aniversario da “extraordinaria” Asociación Cultural Vista Alegre de Bandeira (Silleda) enxalzando a súa “traxectoria como dinamizadora da vida cultural de Silleda”. “Sodes –destacou a presidenta- unha asociación da que sentirnos moi orgullosas e orgullosos, unha das entidades máis activas de Galicia no eido cultural e ademais sinal de identidade da comarca de Deza”.

Asistentes á celebración onte en Silleda.

“Hoxe é un gran día –asegurou a presidenta Carmela Silva-, porque recordamos 40 anos de traxectoria a prol da Cultura pero tamén ás persoas implicadas na construción da escola de Bandeira, emigrantes que tiveron que marchar pero que nunca esqueceron a terra”. Tamén felicitou á presidenta da Asociación Cultural Vista Alegre, Lola Sangiao, e a toda a xente que traballa “nesta marabillosa entidade”, polos esforzos desenvolvidos e remarcou o apoio prestado polo alcalde de Silleda, “que ademais é de Bandeira e lévao con moito orgullo”.


O acto de celebración comezou coa actuación do grupo de gaitas da Asociación Cultural Xirandola, que interpretou dúas pezas musicais. Trala súa intervención presentouse o documental 40 anos de Vista Alegre, producido por Meteórica e dirixido por Adela Otero, no que interviñeron, ademais da presidenta da Deputación Carmela Silva, a actual presidenta da Asociación, Lola Sangiao, expresidentas e expresidentes, socios de honra e personalidades políticas vinculadas á mesma como o alcalde de Silleda, Manuel Cuíña.

Tamén integrantes das diferentes asociacións que forman parte de Vista Alegre como “Xirandola”, “Fortín da Pomba”, os “Xenerais do Entroido de Bandeira”, a “Banda Municipal de Bandeira”, a Asociación de Amas de Casa e Mulleres Rurais “Avelina Valladares” ou a asociación “Amigos da Empanada”, que organizan a famosa Festa da Empanada de Bandeira.

Estrea dunha peza

O aniversario da asociación tamén serviu para estrear a “Xota de Vista Alegre”, composta e interpretada pola Banda de Música de Bandeira.


Orixes A Asociación Cultural Vista Alegre de Bandeira creouse no 1982 co obxectivo de acubillar calquera manifestación cultural da localidade e dos seus arredores, así como dotar de contido á Escola Vella, agora sede da entidade. Entre as múltiples actividades que desenvolven, destacan as musicais pero tamén a promoción da posta en valor da obra do escritor Ramón de Valenzuela e Xosé Neira Vilas, a salvagarda da memoria histórica, así como o feito de terse convertido na referencia de paso para as persoas peregrinas que realizan o Camiño de Inverno ou a Ruta da Prata xa que ten entre as súa encomendas selar as credenciais para acadar a Compostela. Amais ofrece ás e aos escolares unha biblioteca única no rural, que realiza propostas lúdicas para reforzar lazos de veciñanza.

0 comentarios

Commentaires


IRS.gif
Copia de ¡TU Anuncio!.gif
Ecos_da_Comarca_neg.png
bottom of page