O PSOE de Lalín advirte que Crespo "só ten unha valoración dos terreos da Gran Praza"

E asegura que "carece de informes urbanísticas e de Patrimonio"

Ecos da Comarca/Lalín

Tras a revelación pública de que o alcalde de Lalín, José Crespo, pretendía comprar varios

inmobles e fincas no entorno da Praza da Igrexa para dar forma "a súa megalómana idea

dunha praza desmesurada para as características da nosa vila", o PSdeG-PSOE de Lalín

procedeu a petición inmediata da documentación existente no Concello. "Tras un silencio

administrativo, membros do grupo socialista tiveron a oportunidade de examinar a

mesma, na que só se atopou un informe técnico municipal de valoración dos terreos sen

constar no expediente entregado ningún informe de viabilidade urbanística ou de

Patrimonio pois hai afectación pola proximidade á Igrexa e ao Camiño de Inverno", recalcan os socialistas.

“No Concello só un informe de valoración dos terreos, polo que gastar nesa compra 2,5

millóns de euros sen informes urbanísticos, de Patrimonio ou sen a certeza da correspondencia das parcelas é unha barbaridade”, indican.

E indican que "á vista da escasa e incompleta documentación existente e a que no propio informe se detalla a falta de correspondencia entre as superficies que documentan os propietarios e as existentes no catastro, o propio técnico municipal informa que dita situación “deberá ser obxecto das correccións oportunas”". Este feito asombra ao grupo socialista, polas intencións mostradas polo alcalde de mercar os terreos antes das eleccións. Ante isto, os/as socialistas advirten ao alcalde que “calquera compra ou compromiso de compra antes das eleccións do 28 de maio acabará coa inmediata denuncia ao alcalde ante a Xustiza, pois estaría poñendo en risco o patrimonio municipal de xeito temerario”.

A bancada socialista revela que os procesos de corrección catastral, necesarios para a

inscrición en rexistro das fincas, levan o seu tempo e afirman que hai casos no Concello

que ata se demoraron anos: “O que está claro é que non é cousa que se arranxe nunhas

semanas, ao igual que os informes de Patrimonio, que deberían ser preceptivos antes da

compra, pois podería darse o caso de que se impida a alteración do núcleo da Praza da

Igrexa e por conseguinte a necesidade de manter as casas como están”. Ante esas

razóns, os socialistas consideran que calquera movemento que faga Crespo sen aclarar

estes puntos "é absolutamente temerario e improvisado".

Preme na imaxe se queres contactar connosco!

En definitiva, o grupo socialista sinala que “con esta petición e revisión da documentación

“é evidente que Crespo tratou de enganar, unha vez máis, á veciñanza, algo ao que nos

ten acostumados/as, posto que a documentación existente aínda é vaga e imprecisa e

denota algo que xa advertimos hai tempo: o PP non ten modelo de vila e móvese polas

arroutadas de Crespo”.