O palense Luis Vilariño rozou o podio no San Froilán

A dupla Vilariño – Míguez loitou ata o último tramo por subir ao podio no seu regreso ao Campionato Galego de Rallies

Laura Moure/Palas de Rei

O piloto de Palas de Rei, Luis Vilariño, acompañado por David Míguez a bordo da súa Skoda Fabia Rally2 Evo, asinou unha gran actuación na última proba do certame autonómico disputada esta fin de semana nos arredores de Lugo. O equipo chegaba ao Rallye San Froilán tras un destacado cuarto posto en Asturias, no seu regreso á competición despois dun ano de parón.

Co obxectivo de completar a proba e pelexar entre os mellores, Vilariño e Míguez comezaron a cita lucense a un gran nivel, situándose terceiros na clasificación xeral tras o primeiro tramo. Con todo, unha buxaina nunha zona estreita e unha posterior picada fixéronlles perder uns valiosos segundos. A partir dese momento, a dupla iniciou unha gran remontada, recuperando case todo o tempo perdido e chegando ao último bucle con opcións reais de subir ao podio.

 PUBLICIDADE

Preme na imaxe para obter máis información do evento.

Finalmente, a noite non foi a mellor aliada para o piloto de Palas de Rei, que alcanzou o parque pechado, situado en pleno centro de Lugo, cunha meritoria cuarta posición absoluta. “Sobre todo, gozámolo moitísimo. Foi unha carreira realmente divertida, o noso Skoda Fabia Rally2 Evo funcionou que da xenio, e quero darlle as grazas a todo o meu equipo. Impresionounos a cantidade de afeccionados que había nas cunetas e o agarimo que nos mostraron en cada momento da proba. Tiñamos a confianza de poder facer un bo papel e loitar polo podio. Había un gran nivel de rivais, e iso deunos un plus de motivación", recalca.

PUBLICIDADE

Preme na imaxe se queres contactar connosco.

"No primeiro tramo marcamos o terceiro mellor crono, aínda que perdemos esa vantaxe tras sufrir unha picada no segundo. Despois do paso por asistencia saímos a por todas para recuperar os segundos perdidos, o que nos levou a cometer un pequeno erro nunha zona moi estreita. Aínda así, vimos que tiñamos ritmo e fomos recuperando confianza, marcando bos tempos. Chegamos ao último bucle con opcións de ser terceiros e arriscamos cos reglaxes para a sección nocturna, pero a aposta non saíu como esperabamos. Acabamos cuartos, a pouco máis de vinte segundos do podio. Cun chisco máis de fortuna, poderiamos subir, pero estamos realmente satisfeitos co ritmo e a competitividade demostrada. Estas dúas carreiras que disputamos abríronnos o apetito e, seguramente, a próxima tempada volvamos competir de forma máis habitual. Agora toca analizar que opcións temos e que calendario podemos asumir para compaxinar as nosas responsabilidades familiares e empresariais coa competición.”