O Concello de Arzúa dá a coñecer a programación do Día do Comercio Local que será o día 8

Inclúe inchables, a ruleta dos agasallos, premios, música, neve artificial, descontos e diversos sorteos

Laura Moure/Arzúa

Aproveitando a proximidade da campaña de Nadal e a feira quincenal, o Concello de Arzúa organiza varias actividades na rúa que se poderán desfrutar de xeito gratuíto durante todo o día e para todos os públicos. Esta xornada celebrarase o 8 de decembro.

Trópico de Grelos durante a súa actuación en Arzúa o Día do Comercio en 2019.

Durante a tarde haberá diferentes inchables para público infantil na Praza de Galiza en horario de 16:00 a 20:00 horas. Durante o mesmo horario e no mesmo lugar, contarase como novidade coa Ruleta dos Agasallos na que se repartirán mil premios. Para participar o público deberá mercar nos establecementos adheridos unicamente durante o 8 de decembro, día no que por cada 10 euros de merca entregarán un boleto para xogar na ruleta.

Preme na imaxe se queres contactar connosco.

Ademais, a partir das seis da tarde contarase coa actuación itinerante da charanga Santa Compaña que rematará a súa actuación as sete e media na Praza, coincidindo co lanzamento de neve artifical programado como fin de festa.

Paralelamente, durante toda a xornada, os comercios inscritos ofrecerán descontos de ata o 70%, sorteos, agasallos e ofertas especiais en locais de todo tipo como zapaterías, tendas de roupa, librarías ou xoierías, entre outros.