Monterroso demanda a sinatura dun convenio de cooperación económica coa Deputación de Lugo

O importe total ascende a 253.255 euros e cubre necesidades e actividades relacionados coa prestación de servizos públicos aos veciños e veciñas

Laura Moure/Monterroso

O equipo de Goberno de Monterrososometerá a votación no Pleno ordinario de hoxe unha moción para solicitar á Deputación de Lugo a formalización dun convenio interadministrativo de cooperación económica co Concello. A proposta precisa que o acordo debe reunir características análogas aos convenios que a institución provincial vén formalizando con diferentes municipios da provincia para o financiamento de investimentos e gastos correntes de competencia municipal.

Entre as actuacións e necesidades municipais que se pide financiar, todas elas vinculadas á prestación, conservación e mellora dos servizos públicos do Concello de Monterroso, estarían:

1. Mellora, renovación e eficiencia das instalacións de alumeado público municipal. En concreto, solicítanse 30.914 euros para financiar a mellora do alumeado público no Barrio dos Pinos e 23.764 euros para financiar a mellora do alumeado público en Montecalvo.

2. Solicítanse 31.644 euros para a reparación, conservación e equipamento de maquinaria e vehículos municipais destinados á prestación de servizos públicos, incluídos os empregados no servizo de obras municipais e no servizo de emerxencias de carácter

supramunicipal (GES).

3. Pídense tamén 23.596 euros para a subministración de combustibles para vehículos e maquinara municipal necesaria para manter o funcionamento dos medios empregados na prestación de diferentesservizos públicos.

 PUBLICIDADE

Preme na imaxe para obter máis información deste evento.

4. Demándanse 40.730 euros para a administración de produtos alimenticios destinados aos servizos municipais de carácter social, comoa Escola Infantil Municipal, o Centro de Día e o servizo de comidas a domicilio.

5. Tamén se demandan 3.920 euros para o servizo de fisioterapia destinados á mellora da atención e do benestar das persoas usuarias do Centro de Día.

6. Por último, demándanse 98.685 euros para a subministración de enerxía eléctrica para edificios, instalacións, infraestruturas e servizos municipais, necesaria para garantir o seu funcionamento e a continuidade dos servizos.

O importe total das actuacións e necesidades para as que o Concello de Monterroso solicita a cooperación económica da Deputación de Lugo ascende a 253.255 euros.

 PUBLICIDADE

Preme na imaxe para contactar connosco.

O mesmo trato e as mesmas oportunidades

O equipo de Goberno manifesta que a solicitude “non pretende obter ningún trato privilexiado para o Concello de Monterroso”, senón garantir que os seus veciños e veciñas reciben da Deputación Provincial o mesmo trato e as mesmas oportunidades de acceso aos instrumentos de cooperación económica provincial que os habitantes dos demais municipios da provincia.

En consecuencia, demandan que a solicitude sexa atendida "con criterios de igualdade, obxectividade, proporcionalidade e equilibrio territorial e que,existindo convenios mediante os que se financian investimentos, servizos e gastos correntes doutros concellos, se lle conceda igualmente o investimento solicitado a Monterroso para necesidades debidamente acreditadas ou comparables e que, de non ser así, se motive de maneira expresa, suficiente e obxectiva a razón dunha eventual diferencia de trato. Monterroso non debe quedar á marxe de mecanismos de financiamento que a Deputación Provincial considera válidos e utiliza para atender necesidades equivalentes noutros concellos”, remarcan.