Heriberto García Porto, natural de Monterroso, novo secretario xeral de Vivenda e Urbanismo

 Tamén manterá o cargo de director xeral do Instituto Galego da Vivenda e Solo (IGVS)

Laura Moure/Monterroso

O Consello da Xunta aprobou hoxe o nomeamento de Heriberto García Porto como secretario xeral de Vivenda e Urbanismo da Consellería de Vivenda e Planificación de Infraestruturas que tamén manterá o cargo de director xeral do Instituto Galego da Vivenda e Solo (IGVS) que ocupaba ata o momento.

Nado en Monterroso (Lugo), é licenciado en Xeografía e Historia (sección Xeografía Aplicada) pola Universidade de Santiago de Compostela. É funcionario do Corpo Superior da Administración xeral da Comunidade Autónoma de Galicia e desde o ano 1989 ata o 2006 desenvolveu diferentes responsabilidades dentro do Instituto Galego da Vivenda e Solo (IGVS).

Así mesmo, formou parte dos Consellos de Administración de Xestur Pontevedra e de Xestur Ourense. Entre os anos 2006 e 2009 desempeñou a súa actividade na empresa privada en materias relacionadas co sector inmobiliario e o urbanismo. Desde maio de 2009 ata o 2014 ocupou o cargo de secretario xeral no Instituto Galego da Vivenda e Solo (IGVS), así como o de presidente de Xestur Pontevedra.

Publicidade

Preme na imaxe se queres contactar connosco.

Desde o ano 2014 ata a actualidade é director xeral do IGVS e presidente de Xestión de Solo de Galicia S.A. (Xestur Galicia). Participou na elaboración da Lei 8/2012, de vivenda de Galicia, da Lei 1/2019 de rehabilitación e de rexeneración e renovacións urbanas de Galicia e na Lei 3/2022 de áreas empresariais de Galicia.