“Hai un ano que aprobaron a nosa moción referente a este tema, pero a día de
hoxe non hai máis servizos que permitan a nosa veciñanza beneficiarse", indica a candidata socialista á Alcaldía de Lalín
Ecos da Comarca/Lalín
No pleno de febreiro do pasado ano, o PSdeG-PSOE de Lalín presentou unha moción
para instar á Xunta de Galiza a adecuar os horarios das liñas de autobuses entre Ourense
e a capital dezá. Só deste xeito, “a nosa veciñanza se poderá beneficiar realmente da
chegada do AVE a Madrid dende Ourense e das diferentes conexións ferroviarias que hai
dispoñibles”, expón a concelleira e candidata á Alcaldía, Alba Forno.
A solicitude do grupo socialista centrábase en que só existían dúas frecuencias Lalín-
Ourense e unha Ourense-Lalín que non supuñan máis de 30 minutos de agarda. Ante
isto, instaban a Xunta de Galiza a que, polo menos, houbese dispoñibles tres frecuencias
diarias de autobús para a ida e outras tantas para a volta. “Consideramos que as
conexións son aceptables cando non superan os trinta minutos de agarda para o cambio
de modalidade de transporte”, indica. En dito pleno, o goberno do Partido Popular votou a
favor desta proposta, “pero a día de hoxe a situación segue estando igual e os horarios
non se modificaron”.
O AVE entrou en funcionamento no mes de decembro de 2021, “mais a veciñanza
lalinense non ten unha posibilidade real de beneficiarse deste servizo, xa que tería que
agardar horas para ter unha conexión, sen ter que empregar o vehículo propio”. Dende o
PSdeG de Lalín consideran que destas conexións coa capital do Estado non só se
benefician as persoas que se teñen que desprazar por motivos laborais, senón que atrae
ao turismo a Galicia, e “por ende, podería atraelo tamén a Lalín, pero para iso é preciso
unhas mellores conexións nos transportes”.
A candidata á Alcaldía pregúntalle a José Crespo cando ten pensado poñerse a traballar
neste tema, “porque facer Cocidos en Miami ou convocar aos numerosos conselleiros non
é o que fomenta o turismo da nosa vila, senón ter mellores conexións e ofrecer servizos
de calidade”, reprocha Forno e engade que “debería pensar en converter a Lalín nun
destino atractivo”.
