Chega a Arzúa a mostra 'Tres Sesenta' da artista de Touro Sara Naveiro

Permanecerá na Capela da Madanela ata o 26 de xullo dentro da programación cultural do verán

Laura Moure/Arzúa

O Departamento de Cultura do Concello de Arzúa informa da apertura dunha nova exposición dentro da programación cultural deste verán. Este xoves, 3 de xullo, ás 19:30 horas terá lugar na Capela da Madanela o acto de inauguración da exposición Tres Sesenta de Sara Naveiro, artista de Touro. Esta mostra forma parte da programación cultural do verán e poderá visitarse na Capela da Madanela ata o 26 de xullo, de martes a sábados en horario de 19:00 a 21:00 horas.

Sara Naveiro.

O título da mostra fai referencia aos graos da circunferencia. Neste conxunto de cadros, Sara Naveiro pon a figura como protagonista. A colaxe, acuarela, acrílico e rotuladores son algunhas das técnicas utilizadas xunto coa combinación de cores ou a ausencia delas.

Nalgún dos cadros a figura é recoñecible, mentres que noutros é de libre interpretación para o espectador. O escritor e mestre Daniel Asorey colabora nesta mostra coas súas palabras, redactando un texto sobre a súa experiencia ao ver os cadros.

Publicidade

Preme na imaxe para obter máis información do evento.

Sara Naveiro Mirás naceu en Touro, onde estudou no C.P.I. Fonte Díaz. Despois cursou o bacharelato de artes no IES de Sar en Santiago e, posteriormente o ciclo superior de Deseño e Xoiaría na Escola de Arte e Superior de Deseño Mestre Mateo da capital galega. Ademais, estivo durante máis de dez anos na Academia de Artes Altaira, co mestre Xurxo Martinho. Participou en diferentes exposicións conxuntas e algunha en solitario en Malpica, Vimianzo, Boqueixón e Santiago, ademais de na súa vila natal.

Publicidade

O concelleiro de cultura, José Luís García, convida á veciñanza e visitantes a “participar nesta nova proposta artística impulsada pola concellaría de cultura e que forma parte dun programa de exposicións que desde o pasado mes de maio xa supera as 2.000 visitas e que continuará coas colectivas Bo Camiño en agosto e Arte na rúa no mes de setembro”.