A actuación consiste na construción de dous tramos de senda de 1,5 metros de ancho pola marxe dereita da vía, entre os puntos quilométricos 19+120 e 20+630
Laura Moure/Sobrado dos Monxes
A Xunta está a executar obras de mellora de seguridade viaria na estrada AC-934, no treito coincidente co Camiño Norte, ao seu paso polo concello de Sobrado. Os traballos desenvólvense no tramo desta estrada autonómica comprendido entre os puntos quilométricos 19+120 e 20+630.
![](https://static.wixstatic.com/media/0216be_f4b31b27653d4d24960a5a24a01b8a1c~mv2.jpg/v1/fill/w_146,h_109,al_c,q_80,usm_0.66_1.00_0.01,blur_2,enc_auto/0216be_f4b31b27653d4d24960a5a24a01b8a1c~mv2.jpg)
A actuación consiste na execución de dous tramos de senda de 1,5 metros de ancho pola marxe dereita da vía. Tamén inclúe a instalación de tubaxe de 600 milímetros baixo o firme da senda. Ademais, executarase unha obra de drenaxe transversal para cruzar o rego de Lamas baixo a vía.
Os traballos compleméntanse coa mellora da sinalización, coa disposición de novos sinais reflectores e con indicacións relativas ao Camiño de Santiago. Trátase de obras deseñadas para reforzar a seguridade dos usuarios máis vulnerables das estradas, como son os peregrinos.
Esta intervención, cun investimento de preto de 200.000 euros, está incluída nas 70 actuacións que a Xunta executa nas vías autonómicas para reforzar a seguridade nas confluencias cos Camiños de Santiago, cun orzamento conxunto de 1,4 millóns de euros. O Goberno galego, mediante estas actuacións, traballa para favorecer a mobilidade, a comodidade e a experiencia dos peregrinos para atender a maior afluencia que se espera este ano, cando o Xacobeo se prevé máis intenso.