Perruquería Marisa.png

ESPAZO DISPOÑIBLE PARA ANUNCIARSE

Pladur Touro.png

ESPAZO DISPOÑIBLE PARA ANUNCIARSE

A Xunta oferta case 300 prazas públicas nas escolas infantís de Deza para o vindeiro curso

Laura Moure/Deza

A Xunta de Galicia vai ofertar 291 prazas públicas autonómicas na rede de escolas infantís A Galiña Azul na comarca de Deza para o vindeiro curso 2021/2022 tras a correspondente publicación da planificación de centros. Ademais, a Consellería de Política Social acaba de abrir o período de solicitude de praza ata o 12 de abril e informa de que a mesma pode formalizarse por medios telemáticos a través da sede electrónica da Xunta de Galicia. En caso de dúbida, os usuarios poden recabar información nos propios centros infantís.


Por este motivo, o delegado territorial da Xunta en Pontevedra, Luis López, realizou este venres unha visita á escola infantil do Edificio Administrativo de Pontevedra para explicar a planificación desta prestación en toda a provincia e confirmou que, para o vindeiro curso, manteranse as oito escolas infantís nas comarcas de Deza e Tabeirós-Terra de Montes, das que a dúas corresponden ao Concello de Lalín.


Visita de López á escola infantil.

Deste xeito, na bisbarra haberá un total de 33 unidades -de 0 a 3 anos de idade- de atención infantil en funcionamento que comezarán a súa actividade o 6 de setembro de 2021 cun tempo máximo de ata once meses e oito horas diarias por cativo.


Concretamente as prazas na comarca de Deza son: En Lalín, en ambas, tanto a do Pontiñas, como a de Lalín 2000, ofertan cada unha 74; na de Vila de Cruces, 61 e a de Silleda, 82.


Ademais, a Consellería de Política Social mantén, por segundo curso consecutivo, a gratuidade total de matrícula e servizos nas escolas infantís de Galicia –incluíndo as municipais, de iniciativa social e privadas– dos segundos fillos e consecutivos tras a súa implantación hai un ano co obxectivo de facilitar a conciliación e axudar ás economías familiares.


“Temos unha gran rede de escolas infantís que, ademais de atender axeitadamente aos nosos cativos e contribuír a que comecen paseniñamente coa súa formación, amosáronse como un lugar seguro fronte á covid-19”, explicou o delegado territorial, que tamén puxo en valor a gratuidade para os segundos fillos e sucesivos, “xa que se trata dunha medida pioneira e única en España que amosa o compromiso que temos coas familias, coa súa calidade de vida e co favorecemento da conciliación”. “Creo que é unha medida que apoia de xeito real e práctico ás familias e ademais é máis necesaria ca nunca polos adversos efectos socioeconómicos da pandemia”, indicou o delegado.


Deste xeito, Galicia afrontará o vindeiro curso 2021/2022 de atención infantil cun total de 173 escolas públicas de titularidade autonómica cunha oferta de 10.383 prazas, das que 1.132 pertencen a Pontevedra e a súa contorna, e complementa este servizo de conciliación, nos concellos menos poboados, con case 80 casas niño que roldarán o cento ao longo deste ano coa apertura prevista dunha vintena máis.



20 vistas0 comentarios
IRS.jpg

ESPAZO DISPOÑIBLE PARA ANUNCIARSE