Este Concello será o encargado de contratar o persoal, establecer as tarifas, efectuar o mantemento das instalacións e expedir o certificado pertinente
Laura Moure/Agolada
O Consello da Xunta aprobou na súa reunión de hoxe o convenio de colaboración entre a Consellería do Medio Rural e o Concello de Agolada para a xestión do seu centro de limpeza e desinfección de vehículos de transporte no sector gandeiro. O obxectivo deste convenio é establecer as condicións de xestión para a súa explotación, conservación e mantemento por parte do mencionado municipio.
![](https://static.wixstatic.com/media/0216be_c2f9fd30ccd54f5da3eaab7499ba01c3~mv2.jpg/v1/fill/w_143,h_88,al_c,q_80,usm_0.66_1.00_0.01,blur_2,enc_auto/0216be_c2f9fd30ccd54f5da3eaab7499ba01c3~mv2.jpg)
A normativa de sanidade animal establece a obriga xeral de limpeza e desinfección de todos os vehículos ou medios empregados no transporte dos animais de produción, unha vez realizada a descarga no centro de limpeza e desinfección máis próximo habilitado. Este centro deberá expedir un certificado do traballo realizado. Neste senso, resulta imprescindible a promoción das actividades destes centros, co obxecto de asegurar o establecementos de medidas preventivas en materia de sanidade animal.
A través deste convenio, o Concello de Agolada será o encargado de contratar o persoal necesario para a prestación do servizo, establecer as tarifas a satisfacer polos usuarios, efectuará o mantemento das instalacións e expedirá o certificado pertinente trala realización da limpeza e desinfección.
![](https://static.wixstatic.com/media/0216be_920ac7e99d6740489718a96160f25727~mv2.png/v1/fill/w_49,h_35,al_c,q_85,usm_0.66_1.00_0.01,blur_2,enc_auto/0216be_920ac7e99d6740489718a96160f25727~mv2.png)
Pola súa banda, a Consellería do Medio Rural achegará ao Concello o importe definido en concepto de contraprestación pola realización de labores de apoio ao mantemento dos estándares de sanidade animal. Así mesmo, facilitará o asesoramento técnico preciso para que o Concello poida mellorar as condicións do servizo. Neste sentido, o departamento autonómico financiará parcialmente o custo da xestión deste centro, sendo a achega total de 24.000 euros, a razón de 6.000 euros para os anos 2022, 2023, 2024 e 2025.