top of page

A concellaría de Normalización Lingüística do Concello de Arzúa lanza o programa “Galeguízate!”

Busca “promover o prestixio da lingua galega, rachar cos prexuízos sobre ela e aumentar a conciencia en relación co seu uso en todos os ámbitos da sociedade”


Laura Moure/Arzúa

A Concellaría de Normalización Lingüística do Concello de Arzúa vén de lanzar o programa Galeguízate, un ciclo de actividades que, tal e como expresou a concelleira Lucía López Sobrado “buscan promover o prestixio da lingua galega, rachar cos prexuízos sobre ela e aumentar a conciencia en relación co seu uso en todos os ámbitos da sociedade”, sinalou.

A través deste programa realizaranse actividades mensuais, a primeira xa ten data e será o vindeiro venres, 17 de novembro, en colaboración co Departamento de Lingua galega do IES de Arzúa, dirixida ao alumnado de 2º de Bacharelato.


Publicidade

Trátase da presentación do libro A lingua en futuro: a mocidade imaxina o 2050, editado por Catro Ventos, unha obra colectiva na que 17 persoas mozas de diferentes eidos, desde a ciencia, pasando pola música, o xornalismo até a docencia, reflexionan sobre a situación da lingua galega, imaxinan o seu futuro e comparten os desexos que teñen para ela. Participarán nesta presentación no IES de Arzúa o editor Isidro Dozo e unha das autoras, Julieta Insangaray. “Desde a Concellaría de Normalización Lingüística queremos agradecer a colaboración entusiasta por parte do profesorado do IES de Arzúa” sinala López Sobrado.


A edil avanzou tamén que “xa está preparada a actividade que terá lugar no vindeiro mes de decembro. En concreto, o 16 de decembro ás 12 horas na Capela da Madanela aberto a todos os públicos, contaremos co profesor e escritor Carlos Callón, presentando a súa obra O libro negro da lingua galega, co que vén de gañar o premio da Crítica de Galiza 2023, na categoría de investigación”.


Publicidade

A concelleira anima a toda a veciñanza arzuá a “sumarse as actividades que en torno a este programa Galeguízate! iremos desenvolvendo nos vindeiros meses, buscando sempre tomar conciencia da importancia de protexernos o noso ben máis prezado: a nosa lingua propia, a lingua galega, falándoa en todos os contextos, con orgullo de sermos galegas e galegos”.


0 comentarios

Comments

Couldn’t Load Comments
It looks like there was a technical problem. Try reconnecting or refreshing the page.
IRS.gif
Copia de ¡TU Anuncio!.gif
Ecos_da_Comarca_neg.png
bottom of page