top of page

A Alternativa Veciñal de Antas denuncia que "o pasado luns chovía no interior do centro de saúde"

"A día de hoxe nin temos centro de saúde novo nin o actual conta cas condicións necesarias para prestar un servizo de calidade e segue a ter as mesmas deficiencias que fai xusto tres anos", subliña

Ecos da Comarca/Antas de Ulla

Este pasado luns chovía no interior do centro de saúde en Antas de Ulla, tal e como asegura a Alternativa Veciñal de Antas de Ulla (AVA). Por este motivo, esta formación presenta por rexistro preguntas dirixidas ao pleno municipal solicitando información sobre a construción do novo centro de saúde e sobre que actuacións ten previsto o goberno municipal para arranxar as deficiencias do edificio municipal onde se localiza o actual ambulatorio e, de telas previsto, en que prazo se van executar.

"Dende o principio desta lexislatura AVA ven denunciando o mal estado das instalacións, así no pleno do 19/12/2019 presentabamos unha moción de urxencia sobre o estado do centro de saúde e o 07/01/2020 unha reclamación aos orzamentos ante a mala conservación de edificios municipais (en concreto alegamos o mal estado do Centro de Saúde e da Casa da Cultura)", indica.


Ademais, sinala que "o 26/12/2019 diriximos un escrito ao SERGAS o sobre as deficiencias na prestación do servizo. A mala situación do edificio municipal comprobouse polo Xefe de Atención Primaria máis uns cantos técnicos da Xunta na visita que realizaron a raíz desa denuncia o 23/01/2020. As conclusións desa inspección foron que os arranxos que se precisaban eran de tal calado que o máis viable era a construción dun novo centro de saúde".

No pleno do 28/01/20, lembra, "aprobouse por unanimidade de todos os grupos municipais a construción dun novo centro, pero dende AVA volvíamos a poñer o foco no pésimo estado do actual edificio do centro de saúde. Situación que o propio alcalde recoñecía, comprometéndose nese pleno a realizar o mantemento necesario do actual edificio mentres non houbera o novo". Pero “o certo, é que, a día de hoxe nin temos centro de saúde novo nin o actual conta cas condicións necesarias para prestar un servizo de calidade e segue a ter as mesmas deficiencias que fai xusto tres anos, sen ir máis lonxe no día de hoxe chovía dentro do edificio”, recalca María Gontá, voceira de AVA.


0 comentarios

留言


IRS.gif
Copia de ¡TU Anuncio!.gif
Ecos_da_Comarca_neg.png
bottom of page