As contas de 2020, marcadas pola pandemia, arroxaron unhas perdas de 10.234 euros, motivadas pola suspensión no cobro das cotas dos afiliados durante o confinamento
Laura Moure/Deza
A Asemblea Xeral da Asociación de Empresari@s de Deza aprobou este xoves nunha sesión ordinaria cunha reducida afluencia de afiliados/as o orzamento para o exercicio de 2021, que ascende a 345.000 euros no capítulo de gastos e a 349.000 euros no de ingresos.
Por partidas, os gastos corresponden a persoal, docentes e cargas sociais (90.000 euros), formación e servizos aos socios (45.000 euros), gastos de funcionamento (10.000 euros), gastos financeiros-hipoteca (5.000 euros), gastos en campañas (45.000 euros) e Programa Integrado de Emprego (150.000 euros). Pola súa parte, no capítulo de ingresos as principais partidas son: cotas dos asociados (95.000 euros), Programa Integrado de Emprego (155.000 euros), convenios (57.000 euros), subvención para orientación laboral (22.000 euros) e formación (20.000 euros).
Os/as socios/as presentes tamén lle deron o seu visto bo tanto á Memoria de actividades do ano 2020, como ás contas dese exercicio, que arroxaron unhas perdas de 10.234 euros, atribuídas ás mensualidades das cotas de afiliación que a xunta directiva acordou non pasar ao cobro no momento máis duro do confinamento, con todos os negocios e empresas pechados e sen actividade.
Asistentes á asamblea.
Na súa intervención, Antonio Lamas salientou que o ano pasado, durante os peores momentos da pandemia, “a AED volveu amosar o por que da súa existencia, estando ao carón dos seus asociados para axudarlles a solucionar os seus problemas” e “sendo sensibles coas dificultades económicas por mor do confinamento imposto”. Neste senso, lembrou que se asinaron convenios con Sogarpo e Iberaval para favorecer o acceso a microcréditos en condicións vantaxosas, que se xestionaron máscaras para as empresas asociadas cando non as había e que se contribuíu a promocionar a aqueles socios/as que fabricaban ou comercializaban solucións e produtos para combater a Covid-19. Ademais, o presidente salientou o papel desempeñado pola AED nas reivindicacións de axudas ás Administracións Públicas, na aportación de fórmulas para artellar o seu reparto e incluso na organización das mobilizacións de protesta contra a improvisación de medidas que condeaban ao peche aos negocios da hostalaría e o comercio.
Lamas tamén aproveitou para comentar que os estatutos da asociación establecen para o vindeiro ano o remate do mandato da actual xunta directiva e a súa etapa como presidente: “chega o final dun ciclo e espero que esta etapa final sexa en realidade un sprint final, traballando a todo ritmo como levamos facendo desde que accedemos á dirección da AED”. Nunha mensaxe que soaba a despedida, agradeceu “o traballo, a implicación e a lealdade de todos os compañeiros da xunta directiva” e asegurou que “é unha enorme honra ter traballado na defensa dos intereses dos asociados da AED, que en definitiva é traballar na defensa de todo o tecido empresarial dezano”.
Aínda que apuntou que “chegou o momento dun cambio”, non deixou de marcarse como grandes retos para este “sprint final” conseguir que a Xunta de Galicia licite a ampliación do polígono Lalín 2000 e “aproveitar o Xacobeo 21-22 para configurar e consolidar un novo modelo turístico que sexa un revulsivo socioeconómica para Lalín e para toda a Comarca de Deza”.
