O XI CORAZÓN DA ARTESANÍA DE AGOLADA

O XI Corazón da Artesanía. Encontro da Artesanía Tradicional e Popular de Galicia celebrarase os días 5, 6 e 7 de xullo no recinto histórico-artístico dos Pendellos de Agolada. Así, durante tres días en horario de 11:00 a 14:00 horas e de 16:00 a 21:30horas o Corazón da Artesanía xuntará tradición e vangarda nun encontro único no que se contará con demostracións de artesanía en vivo, o programa Artesanía no Prato que xunta gastronomía e artesanía, cursos especializados para artesáns e obradoiros abertos para todos os públicos, animado con música en directo e actividades para nenos. Na edición deste ano está prevista a participación de 53 profesionais da Artesanía de Galicia, 36 como expositores e outros 14 artesáns que participarán como docentes nos cursos de formación especializada e nos talleres abertos. En canto aos expositores de produtos gourmet, contará este ano coa oferta de 32 empresas, 19 das cales contan co selo de Artesanía Alimentaria.

Artesanía no Prato

Nun espazo único, os cociñeiros Álvaro Villasante, Lucía Freitas, Héctor López e Javier Rodríguez Ponte “Taky” realizarán demostracións culinarias nas que empregarán como soporte pezas de 10 obradoiros de Artesanía de Galicia. Haberá pezas de cerámica dos obradoiros de Buño (Malpica de Bergantiños), Alberto Lista e Alfarería Rulo; Cerámica Raposiñas (A Pobra do Caramiñal), Laura Delgado (Cambre), Ojea Studio (Vigo) e Susana Anta (A Coruña); coitelos de Celso Ferreiro (A Fonsagrada); pezas de coiro de Eferro (Merza, Vila de Cruces); e pezas de madeira elaboradas por Atalanta Madera (A Estrada) e Carballo Estrela (Pontevedra).

As sesións de showcookings iniciaranse o venres con Héctor López (dous soles Repsol), do Restaurante España (Lugo), que realizará dous pases en horario de 13:30 a 15:00 horas. O sábado, o cociñeiro Álvaro Villasante, do restaurante Paprica (Lugo), realizará tamén dúas demostracións en horario de 13:30 a 15:00 horas; e a chef Lucía Freitas (1 Estrela Michelín e dous Soles Repsol), do Restaurante A Tafona (Santiago de Compostela), encargarase da demostración das 20:30 horas. O domingo será a quenda de Javier Rodríguez Ponte “Taky”, do Catering Boketé (Cambre), que se encargará dos dous showcookings que terán lugar ás 13:30 e ás 15:00 horas.

A programación de Artesanía no Prato conta coa colaboración da Axencia Galega de Calidade Alimentaria da Consellería do Medio Rural e completarase con dúas catas comentadas domingo 7 de xullo. A partir das 18:00 horas realizarase unha cata dos queixos premiados nas Catas de Galicia (das DOP Queixo Tetilla, Arzúa-Ulloa, San Simón da Costa e Cebreiro) a cargo de Salomé Beiroa, integrante do panel de cata dos queixos galegos con DOP. Ás 19:30 horas, está prevista unha cata comentada de augardentes e licores tradicionais de Galicia, a cargo da vicepresidenta do Consello Regulador das Indicacións Xeográficas das Augardentes e Licores Tradicionais de Galicia, Sonia Otero.

Para poder asistir a calquera destas actividades de Artesanía no Prato é preciso inscribirse previamente no teléfono 692 843 313, en horario de 9:00 a 14:00 horas, ou no correo electrónico info@comunic-artecomunicacion.com.

No Corazón da Artesanía, e tamén no marco do proxecto Artesanía no Prato, realizarase un obradoiro de decoración de mesas “A Mesa Perfecta”, que impartirá Rosana A. Agrelo (Pontevedra), o venres 5 de xullo ás 18:30 horas, que conta xa con todas as prazas cubertas.

Música

A programación musical do Corazón da Artesanía comezará o venres 5 de xullo ás 22:30 horas na Praza do Concello, unha vez rematado o horario de apertura da feira, coa actuación de Comando Curuxás, un quinteto que bebe da música tradicional e popular bailabre de Galicia e do resto de Europa. Nace no ano 2017 coa intención de crear unha murga, cun punto de modernidade, con harmonías e arranxos actuais. Destas ideas iniciais créase o grupo que está formado por Alberto Núñez ao acordeón diatónico; Pablo Pardo «Pacior» na frauta traveseira de madeira e no saxo soprano; Miguel Anxo López nas percusións; Pablo Pascual ao clarinete baixo e Serxio Núñez ao clarinete, pandeiro, gaita e voz. O son de Comando Curuxás lembra as antigas romarías e soa coa intención de que o público se divirta, que goce coa súa música e que baile.

As actuacións musicais do sábado 8 de xullo, tamén na Praza do Concello, comezan co grupo de De Vacas, a partir das 13:30 horas, que presentará o seu traballo Rebovina Divas Live. Faia Díaz, Paula Romero e Inés Salvado – xunto co guitarrista Guillerme Fernández – ofrecerán un espectáculo no que a iluminación e a posta en escena cobran vital importancia nunha homenaxe a estrelas do pop como Whitney Houston, Celine Dion ou Beyoncé, na que “rebobinan” a memoria do tempo a través de mulleres que coas súas cancións acompañaron momentos importantes das súas vidas.

Xa pola tarde, está previsto un pasarrúas a partir das 17:00 horas a cargo da agrupación de música tradicional Bico da Balouta, de Agolada, e a partir das 22:30 horas será a quenda da banda O Sonoro Maxín, que presentará o seu novo disco A primavera ten que ser nosa. Neste espectáculo, o grupo ourensán homenaxea o seu exbatería, Jaime Mateo, finado en decembro de 2021, e presenta novos temas que mestura con parte do repertorio dos seus 15 anos de traxectoria, coas raíces na música máis popular e bailable de distintos lugares do mundo, inventando as cancións da Galicia tropical e ofrecendo as súas flores e froitos convencidos que a primavera aínda está por chegar.

A última xornada do Corazón da Artesanía contará coa actuación de Xabier Díaz e Adufeiras de Salitre, a partir das 13:30 horas na Praza do Concello, que estrean tamén traballo discográfico Axúdame a sentir. Trátase do sétimo disco de Xabier Díaz no que o artista fai unha homenaxe a súa avoa Obdulia, que dicía esa frase con frecuencia e que el considera “unha de tantas catedráticas sen título nesa célebre universidade que é a vida”. De novo poderase ver a mestría de Xabier Díaz partindo dos repertorios tradicionais e actualizalos para chegar a novos públicos.

A programación musical do evento pecharase cun desfile e coa actuación da Agrupación Folclórica – Cultural Xirandaina, a partir das 19:00 horas.