Volve a Arzúa o ciclo de música na rúa con catro concertos de balde este verán

Arranca hoxe con Rondalla Moraima

Laura Moure/Arzúa

O Departamento de Cultura do Concello de Arzúa organiza, dentro da programación cultural de verán, unha nova edición do Ciclo de música na rúa baixo o título de En Aberto. Este ano prográmanse un total de catro concertos ao aire libre. Os mesmos celebraranse na Praza de Galiza ás 21:00 horas, serán de entrada gratuíta e con acceso libre.

Un dos concertos da edición do ano pasado.

Hoxe, xoves, 31 de xullo, terá lugar o primeiro recital da man da Rondalla Moraima que ofrecerá o segundo dunha serie de concertos con motivo da conmemoración do seu 25 aniversario.

Publicidade

Preme na imaxe para obter máis información.

Neste ciclo tamén se subirá ao escenario o xoves 14 de agosto a banda compostelá de música blues Andhrea & The Black Cats que leva pisando moitos escenarios dende 2012 destacando o Festival de Blues de Benicassim e o Sweet Cotton Festival. Hoxe en día están a presentar a súa nova formación, coa incorporación da tuba, dotando aos seus directos dun carácter que fai recordar á vella Nova Orleans.

O xoves 21 será a quenda de Abril, dúo formado por Claudia Abril e Marina Carpente no que melodías tradicionais galegas e ibéricas son adaptadas a sonoridades actuais con certa intimidade, personalidade e frescura.

Publicidade

Preme na imaxe para obter máis información do evento.

A última actuación correrá a cargo do grupo SonBoleros o xoves 28 de agosto. Este cuarteto nace para rendir homenaxe á música latina en Galicia cunha línea moi elegante.

O Concelleiro de Cultura, José Luís García, convida a toda a veciñanza e visitantes “a participar neste ciclo de concertos cargado de variedade de estilos e dunha gran calidade musical co propósito de chegar así a todos os públicos”.