"Temos esperanzas en que Luis López esixa correxir esta anomalía, xa que do contrario, as familias que se puxeron en contacto con nós, mobilizaranse", adianta
Ecos da Comarca/Rodeiro
Unidade por Rodeiro faise eco da gran preocupación por parte das nais e pais que segundo esta formación política lles mostraron nos últimos días pola situación do CPI de Rodeiro "e o mesmo tempo, nos esixiron dar a voz de alarma". En concreto, este malestar está causado "pola eliminación dunha unidade en Infantil, xuntando 20 nenos de diferentes idades nunha aula. Isto é algo inasumible", recalca Unidade por Rodeiro. A unidade que pretenden eliminar, tal e como indica esta formación, é a de catro anos, polo que xuntarán a estes cativos cos de cinco.
E resalta que "a metade, de cinco anos, comeza a ler, a outra metade, de catro, comeza o aprendizaxe das letras, outros extranxeiros non entenden o idioma... Esta situación para unha soa mestra sen apoio impide unha educación de calidade".
Así mesmo confesa que "dende UxR xa fai semanas que sospeitabamos que esta situación se podería dar e lamentamos que dende Educación, sendo o conselleiro veciño do noso concello, prexudique gravemente a nosa educación. A este respecto, temos esperanzas en que Luis López, delegado Territorial, esixa correxir esta anomalía, xa que do contrario, as familias que se puxeron en contacto con nós, mobilizaranse".
A maiores, apunta que "demandamos que se cubra a praza de logopeda e educador especial. Rodeiro, ao igual que o resto de centros educativos, ten nenoscon necesidades diferenciadas polo que, non podemos vernos prexudicados nesta situación. Crer no rural e darlle servizos públicos de calidade. Pola contra, reducir na educación pública é sinónimo de abandono. Esiximos a mellor educación pública para Rodeiro".
Comments