Unha vaca de Dozón é a Miss Lindos Ollos

Rubia logrou esta distinción no concurso Miss Vaca de Luar

Laura Moure/Dozón

O venres pasado celebrouse no Luar da Televisión de Galicia o concurso máis agardado do ano: o Miss Vaca. E de feito, na edición pasada a gañadora foi unha vaca de Rodeiro, propiedade de Bruno López. Pois este ano, tamén houbo representación das comarcas, en concreto de Dozón, e ademais cabe mencionar que as dúas teñen o mesmo nome: Rubia.

Publicidade

Preme na imaxe para obter máis información do evento.

Así o exemplar de Dozón representou á provincia de Pontevedra. "A Miss Pontevedra chámase Rubia. Ten 11 anos e vén de Dozón. Está preñada de catro meses, sabe “andar á corda” e ten auténtico espírito de lideresa. Leva unha choca e sempre vai diante das outras, coa cabeza levantada guiando incluso ás máis vellas. Vive estabulada con cinco vacas máis". Así, desta maneira presentou Luar á candidata deste concello de Deza.

A vaca Rubia de Dozón. Fonte: Luar Oficial.

Rubia competiu con Marela, Miss Ourense, que veu dende Castro Caldelas; con Duquesa do Corgo, Miss Lugo e dende Teo representando á Miss Coruña chegou Blanca que foi a que se alzou coa vitoria. O xurado estivo formado polo antropólogo Manuel Mandianes, a gandeira de Palas de Rei Ana de Cernada e o veterinario Suso García. En segundo lugar quedou Miss Lugo, en terceiro, Miss Ourense e en cuarto, Miss Pontevedra.

Publicidade

Preme na imaxe para obter máis información do evento.

Así mesmo, Blanca tamén se fixo co galardón de Miss Poderosa, pero tamén as outras recibiron algunha que outra distinción: Miss Donaire foi para Duquesa, Miss Aloumiños para Marela e Miss Lindos Ollos para Rubia, de Dozón.

Preme na imaxe se queres contactar connosco.

Lugo, a de máis vitorias

Neste concurso de Xosé Ramón Gayoso, a provincia de Lugo é a que colecciona máis vitorias, en concreto 11. Mentres Ourense e Pontevedra lograron unha respectivamente e A Coruña suma dúas gracias á vitoria deste 2023.