Un avión tivo que aterrar de emerxencia no aeroporto de Santiago pola presenza de fume na cabina

Ecos da Comarca/Xeral

O persoal do Aeroporto de Lavacolla alertou ao 112 Galicia contra as 19:15 horas de onte, explicando que un avión con fume na cabina estaba a punto de aterrar de emerxencia no aeroporto compostelán. A bordo viaxaban 170 pasaxeiros e seis membros da tripulación e solicitaban a colaboración do persoal sanitario e dos bombeiros. Con todo, de inmediato o mesmo persoal confirmou que a aeronave puidera tomar terra sen problemas e que ninguén resultara ferido.

Desde o 112 Galicia informouse aos Bombeiros, á Policía Autonómica e á Policía Nacional, Local e aos voluntarios de Protección Civil de Santiago. Ao mesmo tempo, deuse aviso ao Servizo de Busca e Salvamento (S.A.R.) do Exército do Aire e do Espazo.

Chamada dun particular

Á mesma hora, un particular contactou co CIAE-112 Galicia desde Dodro e indicou que observara unha avioneta que deixaba un ronsel de fume e que parecía dirixirse á zona entre Rianxo e Noia.

Publicidade

Preme na imaxe se queres contactar connosco.

Así, activouse un operativo de busca no que tomaron parte Urxencias Sanitarias de Galicia-061, de modo preventivo, a Garda Civil, os Bombeiros de Boiro e de Ribeira, o GES de Padrón, a Policía Local de Rianxo e o S.A.R. Informouse á Garda Civil de Tráfico, aos voluntarios de Protección Civil de Rianxo e aos axentes da Policía Autonómica.

O persoal do Aeroporto de Santiago indicou pouco despois que podía tratarse da mesma incidencia do avión, pois a hora e a traxectoria dos incidentes coinciden. Ademais, non había constancia de ningunha avioneta pola zona e, por tanto, os servizos de emerxencia retiráronse gradualmente das tarefas de busca.