UCIN Galicia reclama medidas urxentes de restauración e apoio á cidadanía tras os incendios

Ecos da Comarca/Xeral

A Unión de Cidadáns Independentes de Galicia (UCIN Galicia), está a percorrer as zonas máis afectadas polos recentes incendios forestais co obxectivo de avaliar o estado do territorio, coñecer as necesidades da veciñanza e esixir ás administracións públicas unha resposta á altura da gravidade da situación.

Recoñecemento da magnitude dos lumes

UCIN Galicia considera necesario que as institucións recoñezan a dimensión real da vaga de incendios. Referirse ao sucedido como queimadas de “matogueira e pedra”, como fixo

recentemente o presidente da Xunta, Alfonso Rueda, supón minimizar a gravidade dunha

das peores crises ambientais dos últimos anos. "Galicia perdeu miles de hectáreas de valor ecolóxico e produtivo, e esta realidade require da máxima seriedade, compromiso e

respecto".

Restauración e prevención de riscos ambientais

Unha das principais preocupacións de UCIN Galicia é a vulnerabilidade das zonas de forte pendente, como Valdeorras ou Trevinca e Costa da Morte, onde os solos queimados corren un alto risco de erosión e arrastre cara aos cursos fluviais. "Sen unha actuación urxente, podería xerarse unha auténtica “marea negra” de cinzas e sedimentos, con consecuencias moi graves para os ecosistemas acuáticos e para a calidade da auga".

A formación xa advertira deste perigo en comunicados anteriores e volve insistir na necesidade de poñer en marcha plans de restauración inmediatos, con medidas de estabilización do solo, recuperación da cuberta vexetal e protección das ribeiras.

Simplificación administrativa e apoio real á cidadanía

Ademais do dano ambiental, a poboación afectada enfróntase a unha segunda dificultade: a excesiva burocracia para poder acceder ás axudas. UCIN Galicia considera imprescindible que as administracións simplifiquen os procedementos e garantan que as compensacións económicas e os programas de apoio cheguen de maneira rápida e efectiva a persoas, familias e concellos damnificados.

 APOIO AO XORNALISMO PALESTINO

ECOS DA COMARCA APOIA AO XORNALISMO PALESTINO. Preme na imaxe para máis información.

Propostas de UCIN Galicia

Para facer fronte á situación actual e mellorar a prevención futura, UCIN Galicia propón:

1. Incremento de brigadas de prevención e extinción durante todo o ano, especialmente nas zonas de maior risco.

2. Plan de restauración de solos e ribeiras nas áreas queimadas con forte pendente, para evitar procesos erosivos e contaminación fluvial.

3. Creación de fondos de emerxencia específicos que permitan unha resposta rápida ás familias e concellos afectados, evitando atrasos administrativos.

4. Simplificación urxente dos trámites burocráticos para acceder ás axudas, reducindo prazos e requisitos innecesarios.

5. Impulso á xestión forestal sostible, promovendo o mosaico agroforestal e incentivando o aproveitamento económico responsable do monte.

6. Plan galego de educación e sensibilización ambiental, con especial atención á prevención de incendios e á posta en valor do patrimonio natural.

Publicidade

Preme na imaxe se queres contactar connosco.

Compromiso de UCIN Galicia

“Non podemos permitir que, ademais de perder o noso monte, a nosa xente quede atrapada nun labirinto burocrático. Galicia merece unha resposta seria, eficaz e inmediata”, sinalou o coordinador autonómico, José Luis Calo.

UCIN Galicia reafirma o seu compromiso de continuar presente nas zonas afectadas, acompañando á cidadanía, apoiando ás entidades locais e reclamando solucións reais e

duradeiras fronte á praga de lumes que cada ano golpea o país.