UCIN acusa a Feijóo de “oportunismo político” e lémbralle a súa responsabilidade nos incendios

Ecos da Comarca/Xeral

O coordinador de UCIN Galicia, José Luis Calo, acusou este luns a Alberto Núñez Feijóo de “oportunismo político” tras anunciar un plan integral de 50 medidas contra os incendios forestais. Entre as propostas do presidente do Partido Popular figura a creación dun rexistro nacional de pirómanos condenados, que estarían obrigados a portar pulseiras telemáticas con xeolocalización. Para UCIN Galicia, esta medida pode ser útil como ferramenta de control e parte dunha estratexia máis ampla, pero Calo advirte: “O problema dos incendios non se resolve cun rexistro de pirómanos. O que necesitamos son políticas serias de prevención, investimento no rural e dispositivos públicos fortes e ben dotados”.

 Publicidade

Preme na imaxe para obter máis información.

“Galicia arde por decisións do pasado”

Calo lembrou que durante os máis de dez anos nos que Feijóo presidiu a Xunta de Galicia, aplicáronse recortes en brigadas forestais, precarización do persoal de extinción e privatización de medios, o que debilitou gravemente a capacidade de prevención. “Hoxe Galicia sofre as consecuencias daquela política de abandono. Quen debilitou o sistema agora pretende poñerse o traxe de salvador. Esa é a verdadeira herdanza incendiaria de Feijóo”, denunciou.

Publicidade

Preme na imaxe se queres contactar connosco.

"Medidas reais, non propaganda"

O coordinador de UCIN Galicia subliñou que os incendios “non se apagan con titulares nin con anuncios rechamantes”. Para el, as prioridades deben ser:

 • Reforzar os medios humanos e técnicos de extinción.

• Garantir estabilidade laboral e formación ao persoal de brigadas.

 • Investir no rural e na xestión sostible do monte.

• Potenciar a coordinación entre administracións sen duplicidades nin loitas partidistas. “Estamos a falar de vidas humanas, de familias arruinadas e dun patrimonio natural devastado. Non de estratexias electorais”, concluíu Calo.