O lalinense afirma "en todo o equipo estamos moi agradecidos por este respaldo aínda máis contundente, que confirma os desexos de cambio e que reforza as gañas que temos de comezar a traballar canto antes"
Ecos da Comarca/Deza
O candidato de Xeración- RenovaFGA á presidencia da Federación Galega de Automobilismo (FGA), o lalinense Antonio Rodríguez Troitiño, presentará antes do vindeiro martes a súa candidatura tras recompilar o aval de 51 dos 64 novos asambleístas, é dicir, dous máis que os votos obtidos o pasado 27 de novembro na elección dos membros da Asemblea Xeral.
“En todo o equipo estamos moi agradecidos por este respaldo aínda máis contundente, que confirma os desexos de cambio do automobilismo galego e que reforza as gañas que temos de comezar a traballar canto antes”, indicou, antes de precisar que o calendario electoral determina que a toma de posesión do novo presidente non será ata o día 8 de febreiro.
Ademais, Troitiño lembrou que o regulamento e o calendario electoral establecen que ata o 20 de decembro aínda poden presentarse outras candidaturas e, de ser así, os asambleístas votarían para elixir o novo presidente o 22 de xaneiro de 2023: “Somos conscientes de que hai rumores, movementos e chamadas, pero unha vez vista a composición da Asemblea e o número de avais que xuntamos, a aparición doutra candidatura de última hora pareceríame ilóxica, extemporánea e teño claro que neste
momento non buscaría o ben do automobilismo galego, se non que perseguiría outros
fins menos claros”.
Transición “non tan tranquila”
Rodríguez Troitiño tamén lamentou que a “transición tranquila” desexada por Iván Corral o pasado 29 de novembro tras o reconto do voto por correo estea a ser “non tan tranquila como sería desexable”. Ao respecto, cuestionou “algunhas decisións” que se seguen a tomar desde a federación en relación con aspectos organizativos da vindeira tempada, así como “o feito de que se sigan a enviar neste período de transición burofaxes supostamente relacionados coas propostas de inhabilitación promovidas polo presidente saínte”.
“Mensaxe de tranquilidade”
Por último, Antonio Rodríguez Troitiño quixo lanzar unha “mensaxe de tranquilidade” a todas as escuderías e deportistas respecto ao comezo da nova tempada e garantirlles que, se antes do vindeiro martes non se presentan máis candidaturas, comezará a manter reunións con todas as partes implicadas incluso antes da toma de posesión o día 8 de febreiro para “gañar tempo e ir avanzando coas melloras que se poidan aplicar desde o primeiro momento”.
Comentarios