Troiteiros Río Furelos de Melide recolle 300 quilos de lixo nas XXI Xornadas de Limpeza deste río

Este ano, alén dos obxectivos medioambientais e concienciación cidadá, sumou un novo: o do coidado do noso patrimonio cultural

Laura Moure/Melide

A Asociación de Troiteiros Río Furelos de Melide finalizou o pasado 13 de setembro as xornadas de limpeza que desde hai 21 anos realiza. Este ano, alén dos obxectivos medioambientais e concienciación cidadá, sumou un novo: o do coidado do noso patrimonio cultural .

O 30 de agosto deuse inicio a esta limpeza no tramo de 3 quilómetros que vai desde A Ponte de Fraga en Toques ata a ponte da Pedra e continuou coa segunda xornada o 6 de setembro dende A Ponte da Pedra ata a Ponte Mazaira (3 km): "retirar árbores caídas que provocan desbordamentos do río e latas, plásticos e outros elementos que, a pesar das campañas de concienciación cidadá levadas a cabo, aparecen como unha ladaíña todos os anos. O lixo tirado do rio chegou os 300 kg", lamenta o colectivo.

Porén, este ano, apunta, "houbo un aspecto a subliñar: a retirada dunha roda de camión e outra de coche! Por máis veces que procuramos achar unha explicación a este feito, non demos con ela. Que cabeza pode estar detrás da decisión de botar ao leito do río unha roda de camión e a dun coche?", pregúntase a asociación.

 PUBLICIDADE

Preme na imaxe para obter máis información do evento.

A terceira xornada 3 km Ponte Mazaia ata Furelos, levouse a cabo o pasado día 13. "Para nós supuxo un momento emocionante a limpeza da ponte medieval de Furelos porque nos aportou un profundo sentimento de solidariedade, de comuñón, co noso patrimonio cultural. A ponte está aí, leva estando aí, acompañándonos desde hai séculos. E está aí porque mantén unha relación amigábel co Furelos. Abraza ao Furelos... e proxecta o nome de Melide polo mundo. O seu estado era lamentábel e puña en evidencia o desinterese das distintas administración pola conservación do patrimonio cultural. Non era difícil observar que tres, dos catro ollos da ponte, estaban tupidos pola maleza, taponados por árbores caídas e unha bouza que impedía os visitantes tirar unha foto ou, simplemente, contemplala na súa totalidade desde o miradoiro. Alén destas consideracións, ese entupimento, en caso de enchente ou coa repetición destas, podería provocar danos moi graves na estrutura da mesma", recalca esta entidade.

PUBLICIDADE

Preme na imaxe se queres contactar connosco.

Por último, a asociación quere expresar "o noso agradecemento a todas as persoas, empresas e institucións que colaboraron connosco: Concello de Melide, Consellaría de

Medio Ambiente e Deputación de A Coruña".

NOTICIAS RELACIONADAS:

• 200 quilos de lixo recollidos no primeiro día das XXI Xornadas de Limpeza Río Furelos:https://www.ecosdacomarca.com/post/200-quilos-de-lixo-recollidos-no-primeiro-d%C3%ADa-das-xxi-xornadas-de-limpeza-r%C3%ADo-furelos

• 100 quilos de lixo recollidos no segundo día das XXI Xornadas de Limpeza Río Furelos: https://www.ecosdacomarca.com/post/100-quilos-de-lixo-recollidos-no-segundo-d%C3%ADa-das-xxi-xornadas-de-limpeza-r%C3%ADo-furelos