Touro promociónase en Fitur como parada imprescindible na ruta dos peregrinos en bicicleta Eurovelo3
- Laura Moure
- 27 ene 2024
- 1 Min. de lectura
Esta cita tamén serviu para chegar a diferentes acordos con municipios polos que pasa Eurovelo como Arzúa, Sarria ou Pedrafita do Cebreiro
Laura Moure/Touro
Os concelleiros de Turismo e Promoción Económica de Touro asistiron estes días á Feira Internacional de Turismo (Fitur) en Madrid, co obxectivo de tecer alianzas estratéxicas con turoperadores e organismos oficiais para favorecer a comercialización do destino Touro no marco desta ruta cicloturista europea.
Publicidade
Tanto organismos oficiais (como a coordinadora nacional de Eurovelo) como empresas privadas, amosaron interese pola difusión do itinerario e destacaron o seu potencial como destino cicloturista dada a súa riqueza patrimonial e paisaxística, destacando recursos como o campamento romano do Castrillón, a centenaria carballeira de Brandelos coas súas augas mineromedicinais ou a paisaxe de ribeira do río Ulla. Este interese traducirase a curto prazo en diferentes paquetes turísticos que incluirán os aloxamentos e a restauración de Touro entre os seus produtos e que serán comercializados a través de axencias con alcance internacional.
Publicidade
Esta cita tamén serviu para chegar a diferentes acordos con municipios polos que pasa Eurovelo como Arzúa, Sarria ou Pedrafita do Cebreiro, unha alianza que queda aberta a calquera outro concello polo que discorra o itinerario. Nas vindeiras semanas preténdese formalizar un acordo polo que, en colaboración con TURESPAÑA, os municipios promocionarán a ruta na maior feira de cicloturismo europea que se celebrará a finais de febreiro nos países baixos.
Publicidade
Os concelleiros tamén celebran a boa acollida que tiveron os novos trípticos promocionais de Eurovelo ao seu paso por Touro (traducidos ao inglés e holandés) que se esgotaron en varias ocasións no stand de Turismo de Galicia.
Komentarze