Laura Moure/Sobrado
A delegada da Xunta na Coruña, Belén do Campo, e a directora xeral de Patrimonio Natural, Marisol Díaz, acompañadas pola directora territorial da Consellería de Medio Ambiente e Cambio Climático, Pilar Arias, visitaron o concello de Carral para supervisar a actuación realizada ao abeiro da orde de axudas destinada á conservación, recuperación e rehabilitación do patrimonio natural e cultural e á sensibilización ecolóxica na rede de reservas de biosfera de Galicia.
Concretamente, cunha achega autonómica de máis de 7.500 euros, en Carral, que pertence á Reserva da Biosfera Mariñas Coruñesas e Terras do Mandeo, levou a cabo, unha primeira fase, de sinalización ambiental da Ruta da Auga, mentres que a segunda fase se executará co orzamento de 2025. Esta ruta esténdese ao longo de pouco máis de 9,3 quilómetros. A través desta liña de axudas estase a sinalizar a senda entorno á auga, destacando a importancia da conservación das zonas húmidas e máis especialmente a contorna do río Barcés. O proxecto completo contempla un panel de inicio e fin da ruta, catro mesas informativas con código QR, doce postes baixos de madeira para sinalización de continuidade da ruta e seis postes altos con frechas sinalizadoras.
Ademais, este municipio recibiu outra axuda da orde para estudos e investimentos vinculados á conservación, recuperación e rehabilitación do patrimonio natural e cultural e á sensibilización ecolóxica na Rede Natura de case 15.000 euros para un proxecto de educación ambiental para coñecer e conservar o río Barcés. A delegada destacou que estas dúas ordes benefician na área da Coruña a 9 concellos con axudas que ascenden a 270.000 euros.
Reserva Biosfera
Belén do Campo lembrou que a Xunta destinou, este ano, un orzamento global de 1,8 millóns de euros dirixido a financiar actuacións, estudos e investimentos por parte de concellos localizados nalgunha das sete reservas da biosfera existentes en Galicia e que teñan como obxectivo común avanzar na conservación, recuperación e rehabilitación do patrimonio natural e cultural destes espazos.
De carácter bianual e cofinanciadas pola UE a través do Fondo Europeo Agrícola de Desenvolvemento Rural (Feader), o importe máximo destas subvencións foi de 30.000 euros e con elas, as entidades locais poden cubrir o 100% do custo subvencionable.
No caso da comarca da Coruña a delegada informou, que foron beneficiados desta orde ademais do de Carral, os concellos de Miño, Oleiros, Paderne, Sobrado, Arteixo, Bergondo, e Oza-Cesuras por un importe global de case 195.000 euros.
Neste sentido, Belén do Campo salientou que todas as actuacións que resultaron beneficiarias na actual convocatoria teñen o obxectivo común de contribuír a deter e reverter a perda de biodiversidade, potenciar os servizos ecosistémicos e conservar os hábitats e as paisaxes propios destas zonas, que destacan polos seus elevados valores naturais e polo seu desenvolvemento en harmonía coas poboacións asentadas nelas.
Segundo explicou, as actuacións subvencionables agrúpanse en catro grandes liñas de actuación: conservación, restauración e mellora da biodiversidade, especialmente dos hábitats, especies ou ecosistemas naturais, así como aquelas que teñan un impacto favorable na mitigación ou adaptación ao cambio climático; mellora da conectividade ecolóxica de especies de flora e fauna; recuperación de elementos históricos, patrimoniais ou culturais representativos ou precisos para o mantemento da paisaxe agraria, cultural ou etnográfica tradicional; e creación e mellora de infraestruturas de xestión e ordenación de usos recreativos.
Rede Natura
A delegada referiuse tamén ás axudas que recibiron os concellos para financiar estudos e diferentes investimentos dirixidos á conservación, recuperación e rehabilitación do patrimonio natural e cultural localizado na Rede Natura 2000 de Galicia. Esta orde de axudas busca potenciar e preservar os elementos, actividades e paisaxes que caracterizan a Rede Natura, a maior rede de espazos protexidos do mundo, que atesoura un altísimo patrimonio ecolóxico, social e económico.
Cun orzamento global de 2,8 millóns de euros, Belén do Campo explicou que esta convocatoria bianual de axudas está dirixida a concellos incluídos total ou parcialmente na Rede Natura de Galicia, así como a persoas físicas, asociacións sen ánimo de lucro e comunidades de montes veciñais en man común que queiran impulsar proxectos para, por exemplo, a eliminación de especies invasoras, a restauración da vexetación de ribeira ou a recuperación de puntos de auga ou áreas asolagadas.
Publicidade
Ademais, tamén apoia que se leven a cabo actuacións que teñan como obxectivo a mellora da paisaxe agraria en Rede Natura, como a restauración de cercas ou muros de cachotaría e cantería; a adecuación de carreiros rurais; a creación de rutas e áreas recreativas, e a sinalización de camiños e sendas.
En Galicia arredor de 375.000 hectáreas están amparadas baixo esta figura —o 12% do territorio—. Neste sentido, Belén do Campo informou que na comarca da Coruña recibiron subvencións para realizar actuacións nestas zonas, ademais de Carral, os concellos de Miño e Abegondo, por un importe total de case 75.000 euros.
Protección espazos naturais
A representante do Goberno autonómico tamén lembrou que estas non son as únicas axudas que xestiona o seu departamento para poñer en valor os espazos naturais galegos. Así, só en 2024 convocáronse tres liñas de subvencións por un importe global de 6,2 millóns de euros dirixidas a preservar espazos amparados baixo distintas figuras de protección: axudas para parques naturais (1,63 millóns de euros) e as xa mencionadas para Rede Natura (2,8 millóns de euros) e para reservas de biosfera (1,8 millóns de euros).
De feito, Belén do Campo salientou que as axudas para parques naturais e Rede Natura son incompatibles entre si, pero as dúas son compatibles coas de reservas de biosfera, aínda que deben ser axudas para liñas diferentes.
Comentarios