top of page

Silleda xa acabou as actuacións no Sendeiro do Deza para mellorar a accesibilidade e sinalización

Esta acción complementouse cunha axuda autonómica para investimentos non produtivos na Rede Natura 2000


Laura Moure/Silleda

O Concello de Silleda rematou xa os traballos de mellora no tramo que lle corresponde do Sendeiro do Deza, un dos primeiros que se homologaron en Galicia no seu día, e que discorre dende a Fervenza do Toxa, na parroquia de Pazos, ata o mosteiro de Carboeiro, con algo máis de 6 kilómetros de lonxitude. Baixo o título “Recuperación, mellora da seguridade, accesibilidade e sinalización do Sendeiro do Deza”, esta dotación vén a subsanar unha serie de deficiencias para contar co pleno disfrute do sendeiro, un dos máis concorridos do municipio de Silleda, realizando melloras en materia de seguridade, accesibilidade e completando e repoñendo a sinalización existente.


A actuación, cun orzamento de 46.000 euros, recibiu o visto bo da Xunta de Galicia, no marco das axudas a investimentos non produtivos vinculadas á realización de obxectivos agroambientais e climáticos da Rede Natura 2000, cofinanciadas polo Fondo Europeo Agrícola de Desenvolvemento Rural (Feader). Así, o proxecto financiado a súa maior parte con fondos municipais, conta tamén cunha axuda de 20.000 euros –no marco do citado programa-.

Ademais de renovar os máis de 250 metros de baranda protectora de madeira, tamén se colocaron chanzos adicionais nas zonas de máis pendente, reparando ademais escaleiras e creando unha pequena plataforma/observatorio, para a que se barallaron distintas opcións e que finalmente se acotou respecto á memoria inicial pola orografía do terreo. Tamén se renovaron os dous paneis informativos sobre o roteiro e este entorno natrual único, e se colocou un panel interactivo de madeira a modo de xogo cas especies da flora e fauna propias deste espazo natural ubicado no Sistema Fluvial Ulla –Deza, da Rede Natura 2000.


“Fíxose unha intervención mínima preservando o carácter natural deste lugar único, acorde co ámbito no que se atopa e integrando a contorna de forma respetuosa”, indica o alcalde, Manuel Cuiña, que hoxe visitou este tramo do sendeiro xunto á concelleira de Turismo, Mónica González. O tramo, o primeiro do Sendeiro do Deza, comeza ao pé da Fervenza do Toxa, a máis alta de Galicia en caída libre, e discorre pola beira do río durante aproximadamente 260 metros ata a coñecida como Ponte de Ferro, que une o municipio co veciño Concello de Vila de Cruces en Merza. Esta senda foi acometida no seu día pola Consellería do Medio Ambiente, nos anos 90, realizándose despois dende o Concello de Silleda diversas actuaicóns de recuperación.

“Trátase dun dos tramos máis fermosos deste roteiro, no que ademais do espectacular salto do Toxa, hai outros máis pequenos, pozas e zonas de penedos que paga a pena contemplar, e que ten ademais un alto valor paisaxístico nunha zona con gran biodiversidade”, explica o alcalde, Manuel Cuiña, que convida a veciñanza a achegarse a coñecer as melloras realizadas neste entorno.

0 comentarios

Comments


IRS.gif
Copia de ¡TU Anuncio!.gif
Ecos_da_Comarca_neg.png
bottom of page