Silleda convoca o certame de vídeo “Presume de língua” para celebrar o Día das Letras Galegas

A biblioteca municipal desta localidade sorteará lotes de exemplares para celebrar o Día do Libro

Laura Moure/Silleda

O Concello de Silleda vén de poñer en marcha unha nova iniciativa para conmemorar o Día das Letras Galegas. Trátase dun certame de vídeos creativos en formato anuncio publicitario para defender a lingua e a literatura galega, promover o uso do galego entre a mocidade do municipio e incentivar o interese por coñecer e difundir máis a figura das cantareiras, ás que se adica este ano o Día das Letras.

Os vídeos terán que ser de curta duración (mínimo de 30 segundos e máximo, 90). As propostas poden gravarse co móbil ou con cámara doméstica ou profesional. Os traballos deberán ser inéditos e non ter sido presentados a outro concurso ou certame. A temática ten que estar relacionada coa defensa da lingua galega, a literatura galega contemporánea, e a figura das cantareiras.

Dáse liberdade creativa á hora de gravar e editar a idea que se queira realizar (ficción, documental, imaxe real, animación, con ou sen voz en off, uso de música...). É preciso que a persoa autora, en caso de que apareza no vídeo, ceda os seus dereitos de imaxe e autorice asimesmo a cesión dos dereitos de imaxe das persoas que poidan saír na gravación. Tamén é obrigatorio que o texto escrito e/ou falado sexa en galego.

En canto ao sistema de elección dos tres vídeos gañadores, o 50% será o reconto dos “gústame” recibidos nos vídeos participantes que se publicarán na conta oficial de Instagram do Concello. A votación popular será dende o 26 ao 30 de maio ás 14:00 horas. O outro 50% será a valoración dun xurado profesional, puntuando criterios coma a creatividade e orixinalidade da proposta; a calidade técnica e audiovisual; a capacidade para promocionar o galego, as letras galegas e/ou a figuradas cantareiras, así como a mensaxe e impacto emocional.

Publicidade

Preme na imaxe para obter máis información do evento.

En total outorgaranse tres premios que consisten en vales para mercar no comercio local: o primeiro premio de 200 euros; o segundo, 100; e o terceiro, 50. Os traballos gañadores daranse a coñecer o sábado 31 de maio nun acto aberto ao público organizado polo Concello para rematar a programación das Letras, que se dará a coñecer nos vindeiros días.

As persoas que queiran participar neste concurso poderán enviar o seu vídeo “Presume de lingua” ao correo electrónico cultura@silleda.es  antes do 23 de maio ás 23:59 horas. En caso de que o arquivo pese demasiado, pódese enviar a través de WeTransfer. Xunto co vídeo, a persoa interesada deberá enviar tamén a solicitude (Anexo I) debidamente cuberta e asinada pola persoa participante ou pai, nai ou titor/a legal no caso de menores de idade. As bases e o anexo que hai que cubrir pódense consultar xa na páxina web do Concello.

Este certame é unha das actividades programadas dende o Concello para conmemorar o Día das Letras, e que se sumará a outras iniciativas previstas nas vindeiras semanas.

Publicidade

Preme na imaxe se queres contactar connosco.

Por outra banda, a Biblioteca Municipal Daniel Castelao de Silleda sorteará nos vindeiros días varios lotes de libros entre as persoas usuarias. Así, todas aquelas que retiren exemplares durante a semana do Día do Libro (do 21 ao 27 de abril ), entrarán nun sorteo de varios lotes de libros. Deste xeito, o centro municipal celebra o Día do Libro, que se conmemora o 23 de abril.

A biblioteca municipal Daniel Castelao, que se trasladou hai agora 3 anos ás instalacións da rúa Trasdeza número 90, onde xa estivera no seu día, conta a día de hoxe con 710 persoas inscritas como socias, número que segue aumentando nos últimos anos (en 2024 sumáronse 181). A esta cifra hai que engadir a das persoas que fan uso do centro como lugar de lectura e estudo. En canto ao número de títulos, a biblioteca silledense dispón hoxe de 15.413 títulos.