Silleda celebra o vindeiro sábado día 20 a Festa da Árbore dos Chupetes

Inclúe unha merenda saudable con froita fresca e xogos e animación para todas as idades, xa que está aberta a nenos e nenas de 0 a 5 anos e as súas familias

Laura Moure/Silleda

O Concello de Silleda organiza o vindeiro sábado 20 de setembro a segunda edición da Festa da Árbore dos Chupetes, unha iniciativa pensada para crianzas de 0 a 5 anos e as súas familias. A cita celebrarase a partir das 17:00 horas neste céntrico espazo, que se estreaba o pasado ano co obxectivo de crear un lugar simbólico no que os nenos e nenas

poidan deixar os seus chupetes nun momento especial de transición.

A festa, que o pasado ano serviu para a estrea da árbore dos chupetes, celebrarase nesta ocasión coincidindo co inicio do curso escolar, compartindo xogos, ledicia e momentos en familia.

O programa inclúe unha merenda saudable con froita fresca, ademais de xogos e animación para todas as idades, xa que a convocatoria está aberta a nenos e nenas de 0 a 5 anos e as súas familias.

Publicidade

Preme na imaxe se queres contactar connosco.

“Con esta iniciativa buscamos que as familias dispoñan dun momento especial para compartir cos máis pequenos un cambio importante na súa etapa de crecemento, reforzando tamén a convivencia, a creatividade e a ilusión a través do xogo”, sinala a concelleira de Benestar e Educación, Ángela Troitiño.

A Árbore dos Chupetes, situada na Praza Benito Rivas, está xa a converterse nun referente simbólico de Silleda, un lugar cargado de emocións, lembranzas e novos comezos para as crianzas.