Silleda anima á veciñanza e ás asociacións a colaborar na xestión das colonias felinas

O obxectivo é desenvolver o método CER, baseado na captura, na esterilización e no retorno dos gatos ao seu territorio

Laura Moure/Silleda

O Concello de Silleda busca a participación da veciñanza para desenvolver o Plan Municipal de Xestión de Colonias Felinas e anima a colaborar como voluntarias a todas as persoas ou asociacións interesadas no benestar animal. O Plan Municipal de Xestión de Colonias Felinas, impulsado polo goberno municipal, ten como obxectivo controlar a poboación dos gatos nas rúas aplicando o método CER de captura, esterilización e retorno.

Faise así un control sanitario das colonias felinas ao tempo que, grazas á esterilización de polo menos un 75 dos integrantes, se estabiliza a poboación de gatos nas rúas para que vaia diminuíndo e mesmo quede erradicada.

En concreto, o Concello de Silleda propón no seu plan unha serie de pasos que comeza pola captura dos gatos para proceder a desparasitalos e vacinalos, esterilizados e identificalos, antes de devolvelos ao seu territorio de orixe, que estará limpo e desinfectado. Unha vez alí, serán alimentados e vixilados coa fin de facer un seguemento.

Publicidade

Preme na imaxe se queres saber máis deste evento.

Os beneficios deste método de colonias felinas tradúcese nun descenso de enfermidades infecciosas, a hixienización da zona e a diminución progresiva de membros da colonia. Ademais, tamén se demostrou que a esterilización dos machos evita desprazamentos para buscar parella e, con eles, o perigo de accidentes e atropelos.

O Concello de Silleda solicita agora a colaboración da veciñanza para levar a cabo as

distintas accións contempladas no plan. A cada persoa ou grupo de persoas colaboradoras, asignaráselles o coidado dunha colonia e, entre as súas tarefas, estará a subministración dunha alimentación axeitada facilitada polo Concello, a limpeza periódica de comedeiros e bebedoiros e a comunicación co Concello para dar conta de calquera incidencia.

Publicidade

Preme na imaxe se quere contactar connosco.

As persoas ou asociacións interesadas en formar parte do programa deberán cubrir o

modelo de solicitude correspondente (para particulares ou Anexo II para colectivos), que

atoparán na páxina web municipal, e presentalo de xeito presencial no Rexistro Xeral ou

ben telematicamente por sede electrónica. As persoas solicitantes pasarán a formar parte dunha listaxe de persoas colaboradoras autorizadas e recibirán un carné identificativo. Tamén se lles asignará a xestión dunha ou varias colonias.