Silleda acolle a rodaxe da película 'O pesadelo das vacas'

Este luns rodarán en exteriores no entorno da Bandeira e Chapa e durante varias xornadas, xa en outubro, o equipo desprazarase á parroquia de Negreiros

Laura Moure/Silleda

O municipio de Silleda convértese estes días en escenario da película O pesadelo das vacas, que continúa a súa rodaxe en distintas localizacións da zona. Tras gravar varias escenas nas instalacións de Frigoríficos de Bandeira, o equipo de Matriuska Produccións ten previsto iniciar mañá, luns, novas filmacións en exteriores. A primeira das xornadas desenvolverase na estrada que une a N-525, á altura da Calzada (na vila da Bandeira), con Medelo.

O filme presentouse en días pasados no Concello de Lalín.

Dende primeira hora da mañá o tráfico nesta vía sufrirá restricións, das que xa foron informados os veciños e veciñas. A Policía Local de Silleda colaborará nos labores de control e seguridade viaria para facilitar os traballos de rodaxe. Ademais, o calendario de gravación inclúe distintas datas na parroquia de Negreiros, concretamente nos lugares de O Campo e Riocalvo, no entorno de Desgüaces Rolan, así como no Auditorio Municipal Manuel Dopazo da Bandeira. O Concello de Silleda colabora coa rodaxe desta película para a que tamén se utilizarán outros espazos municipiais como o centro social de Negreiros.

O Concello de Silleda e o equipo da película agradecen a colaboración da veciñanza e das persoas usuarias dos espazos municipais, así como a comprensión polas posibles molestias que poidan derivar das restricións de tráfico ou do uso das instalacións durante as datas indicadas

 PUBLICIDADE

Preme na imaxe para obter máis información do evento.

Silleda, un referente para o audiovisual

Dende o ano 2022, Silleda conta cunha ordenanza municipal de rodaxes, unha ferramenta pioneira que regula e facilita a actividade audiovisual no municipio. Esta normativa foi impulsada no marco dunhas xornadas sobre a reactivación do sector audiovisual nas que participou a Spain Film Comisión, entidade que lidera o posicionamento de España como destino de rodaxes, ca organización da Deputación de Pontevedra.

A ordenanza, adaptada ás características de Silleda, establece un procedemento para outorgar permisos de rodaxe, regular a ocupación de espazos públicos e garantir medidas de seguridade, seguros por posibles desperfectos, estacionamentos e protección do mobiliario urbano. Ademais, unifica as solicitudes mediante un modelo único no que as produtoras deben especificar todas as súas necesidades, facilitando así a colaboración co Concello.

Esta iniciativa responde ao crecente interese do sector audiovisual polo municipio, onde é habitual recibir peticións para gravacións de spots, videoclips, documentais ou series, especialmente en espazos singulares como o mosteiro de Carboeiro ou a Fervenza do Toxa.

PUBLICIDADE

Preme na imaxe se queres contactar connosco.

O pesadelo das vacas, dirixida por Rafa de Los Arcos, narra a historia de Celia (María Vázquez), unha muller que regresa á súa vila natal para enfrontarse á sombra do seu pai, un home querido e rexeitado a partes iguais, autor dun crime que marcou a familia e a comunidade. O filme explora temas como a masculinidade tóxica, a violencia de xénero, as feridas familiares e a identidade galega, cunha posta en escena que busca captar a intensidade emocional da protagonista a través de planos curtos, interiores opresivos e a forza da paisaxe do interior de Pontevedra.

A rodaxe, que se prolongará ata finais de outubro, inclúe localizacións en Silleda, Lalín, Rodeiro poñendo en valor o patrimonio natural e cultural da comarca de Deza e xerando un impacto económico directo en hostalaría, transporte e servizos locais.