Silleda aborda con Cogami a posibilidade de asinar un convenio de prácticas non laborais

Ademais aposta por crear unha biblioteca pública inclusiva

Laura Moure/Silleda

O goberno municipal de Silleda mantivo un novo encontro cos responsables do CDR Cogami-Medelo para planificar medidas locais que permitan a inclusión plena das persoas con discapacidade no municipio. Nesta xuntanza participaron a alcaldesa de Silleda, Paula Fernández, a concelleira de Benestar, Ángela Troitiño, o director do centro, Iván García e a educadora Lidia Corral.

Durante a xuntanza abordáronse distintas cuestións, como a adquisición de libros en braille para a biblioteca pública municipal Daniel Castelao, aumentando así a oferta literaria, facéndoa máis inclusiva e mellorando tamén o servizo de préstamo. Así mesmo, dende o centro tamén se plantexou a posibilidade de asinar co Concello un convenio de prácticas non laborais destinado a persoas con discapacidade que lles permita achegarse ao mundo laboral e realizar tarefas nalgún departamento municipal.

Outra medida é continuar ca mellora da accesibilidade nas rúas das vilas, seguindo actuacións como a da rúa Cartaxena, con plataforma única, a rúa da Chousa Nova, rúa Progreso, o entorno do campo da Gandareira ou as obras que se están a facer na praza da Bandeira e a súas rúas da contorna.

Publicidade

Preme na imaxe para inscribirte e obter máis información.

Dende o goberno, tamén se están a adaptar entradas a edificios públicos con rampas e continuarase co rebaixe de beirarrúas nalgúns puntos.O estacionamento para persoas con mobilidade reducida, foi outro dos puntos a tratar neste senso.

Análise sobre o proxecto HAVI

Por outra banda, dende o CDR Medelo-Cogami tamén se plantexou ao Concello a posibilidade de participar no proxecto HAVI (Hacia unha vida independiente), polo que dende o goberno municipal se analizarán as posibilidades de contar cun recurso habitacional para persoas con discapacidade do municipio, valorando a posibilidade de participar no citado proxecto coa creación dun espazo apropiado.

Publicidade

Preme na imaxe se queres saber máis deste evento.

No ámbito formativo, tamén se acordou realizar conxuntamente entre ambas entidades unha charla informativa sobre a nova Lei de Apoios 2024 (Lei 8/2021). A idea é que asistan tanto persoas con discapacidade coma as súas familias.

Por último, tamén se abordaron cuestións como a implementación nas actividades extraescolares para que sexan máis sensibilizadoras, inclusivas e que estean realizadas por persoal formado en materia de discapacidade. Dende o departamento de Benestar xa se está valorando incluílas no campamento de verán do Servizo Lúdico Educativo.

Publicidade

Preme na imaxe se quere contactar connosco.

A alcaldesa, Paula Fernández, agradeceu as aportacións e a colaboración do Centro de Recursos de Medelo e numerosas actividades municipais, destacando a labor que realiza o centro na integración e ocupación das persoas con dispacidade.