Laura Moure/Arzúa
Baixo o lema Semana da Infancia alumnado e profesorado do ciclo superior de Educación Infantil do centro de formación profesional e promoción rural Efa Piñeiral,(Arzúa), están a realizar esta semana un programa de actividades que poñen o foco en diversos aspectos do coidado e educación infantil.
A semana arrancou cunha dinámica de sensibilización protagonizada polo alumnado do ciclo superior de educación infantil sobre a convención dos dereitos da infancia. O martes, o centro arzuán acolleu a mesa redonda A educación infantil como garante dos dereitos na infancia, coa participación de Carmen Pomar, doctora en psicoloxía infantil e docente na universidade de Santiago de Compostela, Ángeles Santamarta, directora do Colegio Nuestra Señora del Rosario en Arzúa e Carla Bartolomé, xurista.
Neste coloquio expúxose a necesidade de que todo técnico en educación infantil teña os coñecementos e habilidades precisas para comunicarse con menores, aínda cando estes non son capaces de verbalizar, ou incluso de falar. Tamén a importancia de educar no lecer e a necesidade de establecer un tándem ben cohexionado entre familias e centro educativo. “O proceso educativo é un, é preciso crear comunidade educativa, é importante proporcionar ós cativos límites e traballar dende a coherencia familia-escola”, afirmou Carmen Pomar.
A programación da Semana da Infancia contempla as tertulias técnicas Dereito da Saúde; o que podemos previr e non facemos a cargo dun profesional da saúde, e A importancia de educar no ocio e no tempo de lecer protagonizada por Ángela de Valenzuela, doctora en educación e que se celebrou este xoves.
Como colofón ás actividades, o sábado 20, a Asociación Piñeiral organiza a conferencia Aspectos legais na intervención con menores, impartida por Mónica Iglesias, abogada de familia e menores.
As actividades son de balde e contan con aforo limitado.
Para máis información, os interesesados pódense comunicar coa Efa Piñeiral no 667 505 657.
Kommentare