O condutor e único ocupante foi evacuado ao centro hospitalario de referencia polos servizos sanitarios de urxencia
Ecos da Comarca/Antas de Ulla
Este luns produciuse un accidente cun autobús ao fío das 13:45 horas na estrada que une Lalín e Monterroso. O ferido, que puido abandonar o vehículo polos seus propios medios, foi evacuado ao centro hospitalario de referencia polos servizos sanitarios de urxencia.
Foron varios os particulares que contactaron co 112 Galicia para informar do suceso. Durante a comunicación cos xestores de emerxencia, as testemuñas do sinistro afirmaban que un autobús estaba envorcado no lugar de Ludeiro, na parroquia de San Martiño de Amarante (Antas de Ulla).
Segundo a información facilitada ao 112, o condutor –e único ocupante do vehículo- parecía ter dificultades para abandonalo e, seguramente, necesitaba asistencia sanitaria.
Con estes datos, desde o Centro Integrado de Atención ás Emerxencias (CIAE) 112 Galicia pasouse aviso de inmediato aos profesionais de Urxencias Sanitarias de Galicia-061, aos Bombeiros de Chantada e ao GES de Monterroso.
Liberado e accesible
Unha vez no lugar, os efectivos de intervención descartaron o uso do material de excarceración xa que o ferido atopábase liberado e accesible. Deste xeito, o equipo médico procedeu a trasladalo ao centro médico en ambulancia.
Cómpre sinalar que desde o 112 tamén se puxo a situación en coñecemento dos axentes da Garda Civil de Tráfico e do servizo de mantemento da estrada.
Comments