Rocío Seijas impugna a aprobación dos Orzamentos de Monterroso "por non respectar as garantías legais"

O goberno local sinala que "está aprobado, polo que continúa os trámites legais preceptivos" e acusa á edil de querer "bloquear o avance do pobo"

Ecos da Comarca/Monterroso

A exalcaldesa de Monterroso e concelleira de Independentes por Monterroso, Rocío Seijas, anunciou onte a impugnación do acordo de aprobación dos Orzamentos Municipais ao considerar que o procedemento seguido para a súa aprobación "non respectou as garantías legais e democráticas que deben presidir a actuación de calquera administración pública".

A edil quere deixar claro desde o primeiro momento que a impugnación non cuestiona o contido dos Orzamentos, nin as partidas económicas que conteñen, senón a forma na que o alcalde decidiu tramitar o acordo máis importante de toda a lexislatura. "Este recurso non pretende reabrir un debate político sobre os Orzamentos. O que pretende é defender un principio básico nun Estado de Dereito: que a legalidade se cumpra e que as regras sexan iguais para todos. A democracia non consiste só en votar; consiste tamén en respectar o procedemento que garante os dereitos de todos", recalca.

Segundo explica a exalcaldesa, o Pleno ordinario tiña unha data preestablecida. "Con todo, o alcalde decidiu non convocar esa sesión, deixou transcorrer o prazo legal e, unha vez recibiu a comunicación fidedigna de que a concelleira se atoparía fóra do termo municipal e non podería asistir, convocou finalmente o Pleno fóra de prazo. Os feitos son obxectivos. O alcalde coñecía oficialmente a miña ausencia antes de convocar o Pleno. A pregunta que segue sen resposta é moi sinxela: por que non convocou o Pleno cando correspondía? Que impedía cumprir o prazo legal? E por que decidiu convocar precisamente o Pleno máis importante da lexislatura despois de coñecer oficialmente que un concelleiro da oposición non podería asistir?", recalca Seijas.

 PUBLICIDADE

Preme na imaxe para obter máis información deste evento.

A concelleira lembra que estes feitos se producen despois de tres anos nos que o goberno municipal "foi incapaz de aprobar uns Orzamentos, mantendo ao Concello nunha situación de bloqueo político e institucional". "Durante tres anos non houbo Orzamentos. Durante tres anos non existiu ningunha urxencia que impedise esperar uns días máis. Por iso resulta difícil comprender que a única data que parecía inaprazable fose precisamente aquela na que o alcalde coñecía oficialmente a miña ausencia. Se realmente o único interese era aprobar os Orzamentos con todas as garantías, abondaba con agardar uns días. Non o fixo. Esa decisión foi exclusivamente súa".

Para a exrexedora, o problema transcende "o ámbito xurídico e afecta directamente á confianza dos veciños nas institucións". "Un alcalde non está para buscar o límite da legalidade nin para adoptar decisións que poidan proxectar dúbidas sobre a imparcialidade da institución. Está para garantir que todos os procedementos se desenvolvan con absoluto respecto á lei, aos prazos e aos dereitos de participación de todos os concelleiros. Esa é a súa primeira obriga institucional".

Ao seu xuízo, a controversia actual non nace da impugnación, senón das decisións adoptadas pola Alcaldía. "Se o Pleno se tivese convocado en prazo e con todas as garantías, hoxe non existiría ningún recurso. O problema non é que a oposición exerza un dereito recoñecido pola lei nin que cumpra coa súa obriga de controlar a acción do goberno. O problema é que o alcalde, podendo evitar este conflito, decidiu actuar doutro xeito e puxo en cuestión a seguridade xurídica do acordo máis importante de toda a lexislatura".

 PUBLICIDADE

Preme na imaxe para obter máis información do evento.

A exalcaldesa considera que esta impugnación non pode analizarse como un feito illado, "senón como a consecuencia dunha forma de gobernar que levou ao Concello a unha situación de bloqueo durante os últimos anos". "A parálise política destes tres anos non pode desembocar agora en decisións que xeren dúbidas sobre o procedemento seguido para aprobar o acordo máis importante do mandato. Os veciños non merecen un Concello bloqueado durante anos e que, cando por fin se aproban os Orzamentos, estes nazan

envoltos nunha controversia que podía evitarse".

Finalmente, a edil responsabiliza politicamente ao alcalde da situación e reclama explicacións públicas. "Despois de tres anos sen Orzamentos, os veciños esperaban un goberno capaz de ofrecer estabilidade, seguridade xurídica e confianza nas institucións. O que atoparon foi un procedemento cuestionado que obrigou a acudir á vía da impugnación. Esa non é a consecuencia da actuación da oposición; é a consecuencia das decisións do alcalde. Quen tiña a responsabilidade de evitar este conflito era el".

Comunicado do equipo de Goberno

O equipo de goberno de Monterroso envíou onte o seguinte comunicado:

"Ante as últimas manifestacións feitas públicas pola concelleira de IXM Rocío Seijas temos que aclarar:

• O presuposto municipal para o ano 2026 está aprobado, polo que continúa os trámites legais preceptivos.

• As contas foron votadas a favor pola maioría absoluta do Pleno, incluído o voto a favor do outro membro de IXM; o mesmo que votou sobre a celebración do pleno ordinario.

 PUBLICIDADE

Preme na imaxe para obter máis información.

Estamos ante un vulgar intento de retrasar a entrada en vigor dos presupostos, pero a presentación do recurso anunciado por Rocío Seijas non impide en absoluto continuar coa tramitación do expediente nos prazos establecidos pola lei. Isto o que demostra é que a esta señora en absoluto lle importa Monterroso. O único que lle importa é chegar ao poder a toda costa como xa ten demostrado cando traizoou ao seu cabeza de lista. Esta señora non ten nada que ofrecerlle a Monterroso. Esta actitude deixa á vista que o único que lle interesa é bloquear o avance do pobo e evitar que a vila progrese, usando burdos argumentos e chegando incluso a mentir dicindo que se ausentaba do termo municipal (cando xa non reside no mesmo) e incluso da autonomía ata despois do día seis, cando foi vista nas festas de Guntín o día 4 e estivo nunha comida en Monterroso o día 5. Con este proceder está claro que Rocío Seijas pouco lle pode aportar a Monterroso", acusa o goberno local liderado polo popular Eloy Pérez.