top of page

Rafael Cuiña anuncia que duplicará as axudas anuais ás escolas deportivas de Lalín

Tamén impulsará a organización dun gran torneo anual de balonmán na localidade que conte sempre cun equipo internacional e os máis destacados de Galicia


Ecos da Comarca/Lalín

O candidato de Compromiso por Lalín, Rafael Cuiña, anuncia que duplicará as axudas económicas ás escolas deportivas do municipio. Ese é un dos eixos fundamentais do seu programa electoral de cara "a fomentar e apoiar ao noso deporte base, dando valor ao seu papel decisivo na formación integral dos nosos nenos e mozos".

Cuiña explica que duplicar as axudas económicas permitirá que estas entidades conten con máis recursos para desenvolver as súas actividades, poñer en marcha novas iniciativas e garantir un acceso igualitario ao deporte para a mocidade do municipio. De maneira específica, o obxectivo será potenciar campus de verán en Lalín de rugby, atletismo, fútbol e balonmán, entre outros.

Rafael Cuiña, no centro, cos membros da candidatura de CxL Joaquín Villanueva Barros “Xocas” (esquerda-xogador do CD Lalín) e Iván Fernández Portela "Ivi" (dereita-xogador do Proquideza Loriga)

O candidato de CxL resalta, nesta liña, o imprescindible papel social que están a xogar as diferentes entidades deportivas de Lalín. Porén, este esforzo, a día de hoxe, “non se ve compensado nin nunha mínima parte polas axudas que reciben do Concello”, di

Cuiña entende que o deporte base é un dos máis importantes piares para a formación de futuros deportistas e tamén para a promoción dunha sociedade saudable e integradora. “Apostar polo deporte base é investir no noso futuro, creando oportunidades e potenciando o talento deportivo local”, afirma.


Excelentes resultados

Nesta liña, resalta os excelentes resultados que están deixando estes días equipos como o CD Lalín, o Proquideza Loriga, o Balonmán Lalín ou o Club de Atletismo. “A todos eles quero felicitalos polos éxitos desta campaña”, salienta.

Cuiña explica que outro dos seus grandes obxectivos para o vindeiro mandato será o de impulsar dende o Concello a organización dun gran torneo de balonmán que se celebre cada ano en Lalín. A intención é que en cada edición desa competición participe sempre un equipo de renome internacional xunto cos mellores equipos de Galicia. “Sen dúbida”, apunta Cuiña, “será un aliciente fundamental para reforzar a importancia do balonmán no noso municipio e converter a Lalín na capital galega deste deporte”.

Cuiña lembra que estas medidas no eido deportivo complementaranse con outras que tamén inclúe o programa para as municipais do 28 de maio e que xa se foron anunciando. Entre elas está a construción dunha pista de atletismo homologada a carón do Lalín Arena ou un novo campo de fútbol 7 no Cortizo xunto co acondicionamento dos locais para os clubes deportivos.

Entre as propostas de CxL tamén están a construción de cinco pistas de pádel homologadas a carón do Lalín Arena para competición e formación; a cubrición dunha das pistas de tenis a carón do pavillón municipal; a remodelación integral do pavillón municipal, incluíndo a posta en marcha dun rocódromo; a construción dun novo skatepark na praza de Europa adaptado ás necesidades dos usuarios; ou a ampliación da piscina municipal exterior.


Tamén se habilitarán instalacións na área de Pozo do Boi para o GTR, acometerase a ampliación e mellora desa área recreativa con novas instalacións infantís, un circuíto deportivo e mellora das pistas de area para deportes de verán; arranxarase e adaptarase a pista que hai o lado do centro comercial de Carrefour para unha maior funcionalidade para xuventude e deportistas de Lalín; e arranxaranse as pistas de tenis próximas ao lago do Pontiñas xunto coa construción de vestiarios e baños.

MITINS DE CXL PARA HOXE, MARTES

  • CAMPOSANCOS-LOCAL SOCIAL-20:15 HORAS.

  • GALEGOS-LOCAL SOCIAL-21:00 HORAS.

  • CERCIO-LOCAL SOCIAL-22:00 HORAS.


0 comentarios

Comments


IRS.gif
Copia de ¡TU Anuncio!.gif
Ecos_da_Comarca_neg.png
bottom of page