Publicada a orde das axudas de compensacións complementarias por lucro cesante e á reposición de gando
- ecosdacomarca
- 14 oct 2024
- 2 Min. de lectura
A Consellería de Medio Rural amplía o orzamento destas nun 40%
Ecos da Comarca/Xeral
O Diario Oficial de Galicia (DOG) publica hoxe a orde mediante a cal se amplía a dotación orzamentaria para as axudas de compensacións complementarias por lucro cesante e á reposición de gando. Neste sentido, esta liña de achegas conta cun montante total de 175.000 euros, un 40% máis con respecto ao orzamento inicial, co fin de poder tramitar todas as solicitudes presentadas que cumpran os requisitos.
Estas achegas están destinadas a aquelas explotacións de gando bovino, ovino e cabrún
rexistradas en Galicia nas que, por indicación da autoridade competente, se teña levado a
cabo o sacrificio obrigatorio de animais durante a execución de programas ou actuacións
sanitarias de vixilancia, loita, control ou erradicación de enfermidades como a tuberculose,
a brucelose ou a lingua azul, entre outras.
Por tanto, teñen por obxecto compensar as perdas ocasionadas como consecuencia do
sacrificio obrigatorio dos seus animais, principalmente no marco dos programas sanitarios
nacionais de erradicación de enfermidades que son de obrigatorio cumprimento. Neste
sentido, veñen a complementar ás indemnizacións polo sacrificio obrigatorio de animais,
de tal xeito que se asegure a viabilidade das explotacións nas que se presentan estas
doenzas.
As axudas complementarias por lucro cesante están destinadas a compensar o período de
inactividade das explotacións nas que se determina o seu baleiro sanitario (sacrificio de
todo o gando), subvencionándose, en base ás marxes brutas medias das diferentes actividades produtivas, tanto o período de corentena (dende o sacrificio ata que a
Consellería do Medio Rural autoriza a incorporación de novos animais), como os tres
meses posteriores, no caso de que o gandeiro non repoña nese tempo o gando. Mentres
tanto, as axudas á reposición están destinadas á compra de animais para repoñer aqueles
que se sacrificaran por resolución da Consellería, en aplicación dos programas oficiais.
Publicidade
Poden ser beneficiarias destas axudas todas aquelas persoas (físicas e xurídicas) e as
entidades que sexan titulares das explotacións afectadas. A intensidade das axudas é do
100% dos custos subvencionables e teñen un claro efecto incentivador por permitir o
desenvolvemento económico das explotacións bovinas, ovinas e cabrúas afectadas por
enfermidades. Cómpre lembrar que o prazo de presentación de solicitudes está aberto ata
o día 29 de novembro de 2024.
Ligazón á orde no DOG:
Comments