top of page

Proposta de adxudicación para a 4ª fase do centro polivalente de Rodeiro por 186.665 euros

O tribunal eleva a oferta de Cíes Obra Civil SL á xunta de goberno local, que pretende resolver a contratación na sesión de hoxe, se chega a tempo toda a documentación


Laura Moure/Rodeiro

A mesa de contratación do proxecto correspondente coas obras da 4ª e derradeira fase do Centro Polivalente de Uso Asistencial de Rodeiro, emprazado entre o Centro Cultural Manuel Lamazares e a zona deportiva da localidade, vén de realizar unha proposta de adxudicación, pola empresa Cíes Obra Civil S.L., para unha actuación que conta cun orzamento de 186.665 euros.

Segundo o acordo adoptado, a mesa de contratación eleva esta proposta –por tratarse da máis vantaxosa e da que obtivo maior puntuación na baremación– á xunta de goberno local de Rodeiro, que ten a intención de resolver a contratación na sesión de hoxe, venres 26, se chega a tempo toda a documentación.

A empresa, en caso de ser finalmente a adxudicataria, disporá dun prazo máximo de tres meses dende a sinatura de contrato, que se prevé para as semanas seguintes tras a comunicación da adxudicación a dita firma e os habituais trámites administrativos previos, e da posterior acta de replanteo, que é a que marca a data oficial de inicio de obra.

En base ás previsións do goberno local, as obras comezarán posiblemente entre os meses de xuño e xullo, cando xa estean rematadas as principais actividades deportivas e escolares, co propósito de non interferir nas mesmas, posto que na contorna da actuación haberá actividade construtiva.

Esta 4ª fase do Centro Polivalente de Uso Asistencial permitirá definitivamente a conclusión deste inmoble, xa que consistirá no remate integral da fachada e na instalación das carpintarías exteriores, principalmente portas e fiestras, así como outras pequenas obras menores, tal e como informa o Concello.

A obra, que conta cun orzamento global de 200.000 euros incluíndo os emolumentos da redación do proxecto, permitirá poñer a disposición do Concello de Rodeiro un edificio que se orientará, principalmente, á prestación de actividades e servizos do Departamento de Servizos Sociais adicados sobre todo ás persoas maiores e cativos.



0 comentarios

تعليقات


IRS.gif
Copia de ¡TU Anuncio!.gif
Ecos_da_Comarca_neg.png
bottom of page