Preto dun centenar de persoas participou nun paseo guiado pola Ruta das Corredoiras en Arzúa

Unha actividade organizada pola concellería de Turismo de Arzúa, encabezada por Begoña Balado, en colaboración co influencer galego Guido Guía e co director do proxecto Patrimonea, Darío Rey

Laura Moure/Arzúa

Preto dun centenar de persoas participou o sábado nun paseo guiado pola Ruta das Corredoiras, unha actividade organizada pola concellería de Turismo de Arzúa, encabezada por Begoña Balado, en colaboración co influencer galego Guido Guía e co director do proxecto Patrimonea, Darío Rey.

A iniciativa, que se enmarca dentro da estratexia de promoción “Arzúa Destino Verde”, tivo como obxectivo poñer en valor o patrimonio natural e histórico da vila e da súa contorna. A andaina arrancou ás 11:00 horas na Praza de Galicia e prolongouse ata as 14:00 horas, ofrecendo aos asistentes unha experiencia inmersiva polas corredoiras tradicionais que circundan a parroquia de Pantiñobre.

A Ruta das Corredoiras é un itinerario circular de 15 quilómetros que permite aos camiñantes mergullarse na paisaxe rural de Arzúa. O percorrido reúne unha antiga rede de camiños veciñais, utilizados durante xeracións polos habitantes da zona, e conecta espazos de gran valor patrimonial, como a capela de San Xoán de Navas ou a Casa dos Frades.

Durante o traxecto, os participantes puideron coñecer a riqueza do territorio da man de Guido Guía, quen achegou unha ollada divulgativa e inspiradora, destacando a importancia de conservar e difundir a memoria das corredoiras como parte esencial da identidade local.

O roteiro inclúe ademais un tramo do histórico Camiño Francés, vía milenaria que reforza a condición de Arzúa como punto clave do turismo cultural e espiritual en Galicia.

A concelleira Begoña Balado salienta “a importancia de promover actividades que poñan en valor o noso patrimonio e fomenten un turismo sostible e de calidade, no marco de Arzúa como Destino Verde”.

Publicidade

Preme na imaxe se queres contactar connosco.

Con esta acción, o Concello de Arzúa reafirma o seu compromiso coa dinamización do territorio a través de iniciativas que combinan natureza, historia e participación cidadá.

Ao rematar a ruta na praza da vila, os senderistas participantes, puideron gozar a Festa da Gaita Galega e Cantos de Taberna, así como dunha xornada na que non se perderon a rica gastronomía local, de Arzúa.