O operativo estará composto de axentes da Policía Nacional, Garda Civil, Policías Locais e Policía adscrita á comunidade autónoma
Laura Moure/Xeral
O delegado do Goberno en Galicia, Pedro Blanco, informou do dispositivo de seguridade habilitado pola Delegación do Goberno en Galicia para garantir a normalidade na xornada electoral do próximo domingo, 18 de febreiro. Serán un total de 7.364 efectivos das Forzas e Corpos de Seguridade estatais, autonómicos e locais que velarán pola seguridade no exercicio do dereito ao voto o día das eleccións ao Parlamento de Galicia.
En concreto, a Garda Civil despregará 4.178 axentes e a Policía Nacional, contando coa Unidade de Policía Adscrita, outros 2.182 axentes. Pola súa banda, os distintos corpos de Policía Local mobilizarán 1.004 axentes.
Publicidade
Por provincias
Por provincias, na Coruña o dispositivo estará formado por 2.617 axentes (1.454 da Garda Civil, 792 de Policía Nacional e Policía adscrita e 371 da Policía Local); 1.133 na provincia de Lugo (774 da Garda Civil, 266 de Policía Nacional e Policía adscrita e 93 da Policía Local); 1.132 en Ourense (770 da Garda Civil, 267 de Policía Nacional e Policía adscrita e 95 da Policía Local), e 2.481 en Pontevedra (1.180 da Garda Civil, 857 de Policía Nacional e Policía adscrita e 445 da Policía Local).
A Delegación do Goberno ten as competencias en materia de seguridade nos procesos electorais. Entre as súas funcións está a de garantir a seguridade cidadá no exercicio dos dereitos e liberdades no día da votación; a vixilancia e protección de infraestruturas críticas, así como a ciberseguridade de todo o proceso e os dispositivos dos colexios electorais e as súas proximidades, e a coordinación das Forzas de Seguridade do Estado coas corpos autonómicos e locais.
Publicidade
O dispositivo, que estará operativo desde primeira hora da mañá e ata que se faga público o reconto de votos, velará por que a xornada electoral decorra sen incidencias nos 2.346 colexios electorais repartidos pola comunidade. Neles poderán exercer o seu dereito ao voto 2.217.089 persoas electoras residentes en Galicia das 2.696.177 que compoñen o censo electoral na comunidade. As restantes 476.544 corresponden ás persoas electoras residentes no estranxeiro (CERA).
Comments